«Ákim bol, halqyńa jaqyn bol!». Oryndalmaıtyn osy talap qurǵaq aqyl kúıinde qala beretin sıaqty. Qý qulqynnyń qamy úshin júrgender «iship-jem qoımasynyń» isinýinen basqaǵa bas qatyrmaıdy. Tek búginimen ǵana ómir súrýge áýes.

Birde Aqmola oblysynyń Qarajar aýyldyq okrýgine ákim bolǵysy kelgen sondaı bireý ustalyp edi. Aty-jóni – Valentına Marker. Ol jalǵan dıplommen 15 jyl boıy orta mektepte orys tili men ádebıetinen «sabaq berip» kelgen. Nebári 55-aq myń teńgege satyp alǵan qoldaǵy qujaty boıynsha, «Abaı atyndaǵy Qazaq Ulttyq pedagogıkalyq ýnıversıtetiniń fılologıa fakúltetin támamdaǵan». Al joǵary oqý ornynda múldem oqymaǵany endi memlekettik qyzmetti biraz shaıqaǵysy kelgende bir-aq áshkerelendi. Oǵan deıin aýyl muǵaliminiń bir ret te sesıaǵa suranyp, Almatyǵa barmaǵanyn bile tura, eshkim teksermepti. Ákimdikke umtylmaǵanda, «ustazdyǵyn» zeınetke shyqqansha jalǵastyra beretindeı eken. Oǵan Qarajar aýyldyq okrýginiń ákimi mindetin 5 aı atqaryp tastaǵanyn qosyp qoıyńyz... Sonda, ol sottalǵan bolsa da báribir sıaqty ma, qalaı?..

Osyǵan uqsas ekinshi derek 2013 jyly Qyzylorda oblysynyń Qazaly aýdanynda tirkeldi. Ondaǵy Tasaryq aýyly ákiminiń mindetin atqarǵan sheneýniktiń de oqýǵa ýaqyty bolmasa kerek. Jumsaq oryntaǵynan jalǵan dıplomy jarǵa jyqqansha túspeı kelgen.

Kezekti «satyp alýshy» Qostanaı oblysynyń Amankeldi aýdanynda ustaldy. Ol da jergilikti mektepte jumys istegen. Joǵary jalaqy alý maqsatynda 2005 jyldyń 5 maýsymynda Y.Altynsarın atyndaǵy Arqalyq memlekettik pedagogıkalyq ınstıtýtyn «támamdapty». Onysy aýdandaǵy bir aýylǵa ákim retinde saılaýǵa túspekshi bolǵanda anyqtaldy.

Áıteýir, jemqorlardy maýjyratyp qoıatuǵyn jyly orynda jyltyrap otyrýdy maqsat etkender kóp-aq. Jyly-jumsaqpen meldek atqysy keledi. Qalaı da olaı soǵan jetýi kerek. Aram jolmen. Arlanbastan. Ákimdik ákesinen qalǵandaı. En baılyqtan enshisin alǵandaı.

P.S. Ekiniń biri keńse men úıiniń arasynda shirenip júrgisi kelse, aldymen oqýdy ońdyrýy tıis qoı. «Dvoechnıkter» elinde júrgen joq shyǵarmyz...

Erkeǵalı BOLATULY