AQSH Irannyń ıadrolyq baǵdarlamasy jónindegi birlesken josparynan shyǵady, dep málimdedi AQSH prezıdenti Donald Tramp Aq úıdegi baspasóz konferensıasy kezinde.

«Kelisim Iranǵa óziniń ıadrolyq baǵdarlamasyn keńeıtýge ǵana jol ashty. Ol kelisimde mańyz joq. Irannyń ýádesi ótirik ekenin biz dáleldeı alamyz. Bul beıbitshilik ákelmegen birjaqqty kelisim boldy. Ol eshqashan beıbitshilik ákelmeıdi. Men bul kelisimniń qalýyna jol bersem, onda ol búkil Taıaý Shyǵysta ıadrolyq qarýlaný jarysyna alyp keledi. Men AQSH-tyń ıadrolyq kelisimnen shyqqanyn jarıalaımyn», - dedi Tramp.

AQSH prezıdentiniń aıtýynsha, Iran bıligi birlesken erejeni qaıta qaraýdan bas tartqan. Sonymen birge ol Tegeran raıynan qaıtsa, jańa sharttarmen jańa kelisim jasaýǵa daıyn ekenin aıtty.

Tramp Iranǵa qarsy sanksıalar qabyldanyp, birden kúshine enetinin málimdedi.

Ol Irandy «Hezbolla», «Hamas», «Talıban» jáne «Ál Qaıdany» qoldaǵany úshin terorızm demeýshisi dep atady. Deı turǵanmen Tramp AQSH-tyń «avtorıtarlyq júıe basyp alǵan» Iran turǵyndaryn jaqtaıtyndyǵyn málimdedi.