Búgin Jeńistiń 73 jyldyǵyn atap ótý rásimi aıasynda Astana qalasyndaǵy «Otan qorǵaýshylar» monýmentine gúl shoqtaryn qoıý rásimi ótti, dep habarlaıdy Astana qalasy ákimdiginiń resmı saıty.

Saltanatty sharaǵa Úkimet basshysy Baqytjan Saǵyntaev, Senat tóraǵasy Qasym-Jomart Toqaev jáne Májilis tóraǵasy Nurlan Nyǵmatýlın, Prezıdent ákimshiliginiń basshysy Ádilbek Jaqsybekov, memlekettik jáne qoǵam qaıratkerleri qatysty.

«Meniń ákem II Belarýs frontynda soǵysty. Ony 1942 jyldyń qańtar aıynsha áskerge shaqyrǵan. 1944 jyly Polsha jerinde jaraqat alǵan. Meniń kókem – Qasym Boltaev, Tver oblysynyń Rjev aýdany Trýbıno aýylynda jatyr, Rjev úshin bolǵan shaıqasta qaza tapqan», - dedi Senat tóraǵasy Qasym-Jomart Toqaev.

Soǵys ardagerleri, qala turǵyndary men qonaqtary surapyl soǵysta qaıtys bolǵandardy bir mınýttyq únsizdikpen eske alyp, «Máńgilik alaýǵa» gúl shoqtaryn qoıdy.

«Meniń oıymsha Qazaqstannan bul soǵysqa qatyspaǵan otbasy joq shyǵar. Bul mereke bizdiń el úshin óte zor mánge ıe. Bul kún bizdiń atalarymyzdyń erlik kórsetip, jeńiske jetken kúni», - dedi «Nur Otan» partıasy tóraǵasynyń birinshi orynbasary Máýlen Áshimbaev.

Monýment alańynda áskerı palatkalardan qalashyq qurylyp, ardegerler men tyl eńbekkerlerine arnalyp merekelik dastarhan jaıyldy.

«Biz Kenıgsbergke jetkende Jeńiske jettik degen habar jetti. Halqymyz bar qıyndyqqa qaramastan jeńiske jetti. Biz ózimizge júktelgen mindetti abyroımen atqardyq, endi sizderdiń mindet elimizdiń kórkeıýine eńbek etip, dostyǵymyzdy jalǵastyra berińizder. Halqymyzdyń dostyǵy máńgi bolsyn», - dedi Máskeýden kelgen ardager Petr Solomatın.

«Otan qorǵaýshylar» monýmentiniń janyndaǵy «Parýs» sahnasynda Astana qalasy ákimdiginiń memlekettik akademıalyq fılarmonıasynyń jáne M. Gorkıı atyndaǵy Memlekettik akademıalyq orys drama teatrynyń ártisteri óner kórsetti.

Merekelik konserttik baǵdarlamalar «Stýdentter saıabaǵynda» jalǵasady, onda elordanyń jetekshi shyǵarmashylyq ujymdary áskerı ánder shyrqaıdy.