Qazaqstan Prezıdentiniń dinı qyzmet salasyndaǵy memlekettik saıasatty júrgizý, memlekettik jastar saıasatyn iske asyrý, sondaı-aq volonterlermen jáne úkimettik emes uıymdarmen ózara is-qımyl júrgizý jónindegi tapsyrmalary men bastamalaryn júzege asyrý týrasynda QR Din isteri jáne azamattyq qoǵam mınıstrligi belsendi jumys atqaryp keledi.
Búgin Qazaqstan Respýblıkasynyń Din isteri jáne azamattyq qoǵam mınıstri Darhan Káletaev Ulybrıtanıa jáne Soltústik Irlandıa Birikken Koróldiginiń Qazaqstan Respýblıkasyndaǵy Tótenshe jáne Ókiletti Elshisi Maıkl Djon Gıffordpen kezdesti, dep habarlaıdy Qamshy.kz aqparat agenttigi Din jáne azamattyq qoǵam mınıstrliginiń baspasóz qyzmetine silteme jasaı otyryp.
Kezdesý barysynda din jáne azamattyq qoǵam salasyndaǵy ekijaqty yntymaqtastyqtyń jaı-kúıi, sondaı-aq, Výlf ınstıtýty delegasıasynyń Qazaqstanǵa saparyn uıymdastyrý máseleleri talqylandy. Bul ınstıtýt ıýdeıler, hrıstıandar jáne musylmandar arasyndaǵy qarym-qatynasty akademıalyq zertteýmen aınalysatyn álemdik kóshbasshy uıymdardyń qatatyna kiredi.
Aǵymdaǵy jyldyń mamyr aıynyń sońyna qaraı atalǵan delegasıanyń sapary aıasynda birqatar is-sharalar ótkizý josparlanǵan, atap aıtqanda, mınıstrlikte kezdesý ótkizý, dinı ǵımarattardy aralaý, sondaı-aq Mádenıetter men dinderdiń halyqaralyq ortalyǵy jáne «Výlf» ınstıtýty arasyndaǵy yntymaqtastyq týraly memorandýmǵa qol qoıylady dep kútilýde.
Áńgimelesý kezinde Darhan Káletaev Qazaqstan Respýblıkasy men Ulybrıtanıa Birikken Koróldiginiń arasynda tyǵyz jáne senimdi qarym-qatynas qalyptasqanyn atap ótti.
D. Káletaev elimizdegi azamattyq qoǵam ınstıtýttaryn damytý barysymen tanystyryp, memleket pen din arasyndaǵy ózara is-qımyl modelin qalyptastyrýdaǵy sharalardy baıandady. Atap aıtqanda, mınıstr 2017-2020 jyldarǵa arnalǵan din salasyndaǵy memlekettik saıasattyń tujyrymdamasy qabyldanǵanyn, onyń negizinde din salasyndaǵy zańnamaǵa ózgetýler engizý boıynsha qujattar paketi ázirlengenin atap ótti.
Kezdesý sońynda taraptar din jáne azamattyq qoǵam salasyndaǵy ózara is-qımyl jóninde syndarly yntymaqtastyqty damytýǵa qyzyǵýshylyq bildirdi.
