Búgin Qazaqstan Respýblıkasy Din isteri jáne azamattyq qoǵam vıse-mınıstri Berik Aryn «Qazaqstan Respýblıkasy-Eýropalyq Odaq» parlamenttik yntymaqtastyq komıtetiniń teń tóraǵasy Iveta Grıgýle bastaǵan Eýropalyq parlamenttiń delegasıasymen kezdesý ótkizdi.
Aıta ketsek, Eýropalyq Parlamenttiń (EP) Ortalyq Azıa jáne Mońǵolıa elderimen yntymaqtastyq jónindegi delegasıasynyń tóraǵasy Iveta Grıgýle-Peterseniń bastaǵan EP delegasıasy 10 mamyrda Astanaǵa kelgen bolatyn.
Delegasıa «Qazaqstan Respýblıkasy – Eýropalyq Odaq» Parlamenttik yntymaqtastyq komıtetiniń 15-shi otyrysyna qatysý úshin Astanaǵa saparmen keldi. Atalǵan ınstıtýt 1999 jyldan bastap jumys istep keledi jáne teń parlamentaralyq dıalog júrgizý úshin tıimdi alań retinde qyzmet etedi.
Kezdesýge sondaı-aq, Qazaqstan Respýblıkasynyń Belgıa Koróldigi jáne Lúksembýrgteg Tótenshe jáne Ókiletti Elshisi, Qazaqstan Respýblıkasynyń EO jáne NATO Ókildiginiń basshysy Almaz Hamzaev, Din isteri komıtetiniń tóraǵasy Erkin Ońǵarbaev, Azamattyq qoǵam isteri komıtetiniń tóraǵasy Álıa Ǵalymova, Jastar saıasaty departamentiniń dırektory Asqat Oralov qatysty.
Berik Aryn Eýropalyq parlament depýtattaryn Eýropa kúnimen quttyqtap, olardy Din isteri jáne azamattyq qoǵam mınıstrliginiń dinı salany retteý, memleket pen azamattyq qoǵamnyń ózara is-qımylynyń tıimdi úlgisin qalyptastyrý jáne memlekettik jastar saıasatyn júzege asyrý jónindegi qyzmetimen tanystyrdy. Sondaı-aq, vıse-mınıstr Eýroparlament depýtattarynyń suraqtaryna jaýap berdi.
Atap aıtqanda, eýropalyq parlamentshiler Qazaqstanda azamattyq qoǵam ınstıtýttarynyń damý erekshelikterine, dinı ekstremızmge qarsy áreket etý tájirıbesine, ÚEU-dyń qyzmetine qatysty Qazaqstan Respýblıkasynyń zańnamasyna qyzyǵýshylyq tanytty. Óz kezeginde depýtattar EO elderiniń salyq salý salasyndaǵy úkimettik emes uıymdarǵa qolaıly jaǵdaı jasaýdaǵy tájirıbesi týraly aıtyp berdi.
Kezdesý qorytyndysy boıynsha konfesıaaralyq únqatysýdy qamtamasyz etý, dinı ekstremızmge qarsy áreket etý jáne azamattyq qoǵam ınstıtýttaryn damytý sheńberinde Qazaqstan men Eýropalyq Parlament arasyndaǵy belsendi yntymaqtastyqty odan ári damytýdyń mańyzdylyǵy atap ótildi.
Esterińizge sala keteıik, 2018 jylǵy 10 mamyrda Qazaqstan Respýblıkasy men Eýropalyq Odaqtyń syrtqy saıası jáne qaýipsizdik máseleleri talqylanǵan «Qazaqstan Respýblıkasy - Eýropalyq Odaq» parlamenttik yntymaqtastyq komıtetiniń 15-shi otyrysy ótken bolatyn.
Qazaqstannyń Eýropalyq Odaqpen saýda-ekonomıkalyq baılanystary joǵary deńgeıde saqtalyp otyr. Eýroodaq Qazaqstannyń negizgi saýda jáne ınvestısıalyq seriktesi. Onyń úlesine QR-dyń syrtqy saýda aınalymynyń 50% jáne el ekonomıkasyna tartylǵan sheteldik kapıtaldyń jartysynan astamy tıesili.
