Almaty qalasyndaǵy Alataý aýdanynda 164 kósheniń ataýy ózgerdi, dep habarlaıdy Qamshy.kz aqparat agenttigi. Bul týraly saıasattanýshy Aıdos Sarym óziniń Facebook-taǵy paraqshasynda jazdy.

"98 paıyzy qazaqy ataý! Arasynda Farıza Ońǵarsynova, Móńke bı, Moldıar Serikbaev, Rafıqa Nurtazına, Jáńgir han, Ábish Kekilbaev, Ábilqaıyr han, Erkeǵalı Rahmadıev, Hasen Oraltaı, Saǵı Áshimov, Batyrhan Shúkenov atyndaǵy kósheler bar! Qutty bolsyn! — dep súıinshi surady Aıdos Sarym.

Kúni keshe "Qamshy" portalynda "Almaty kóshelerinde bodandyqtyń izi saırap jatyr" degen maqala jaryq kórgen edi. Avtor Almatyda úlkendi-kishili 711 kóshe bar ekenin aıtyp, onyń 100-ge jýyǵy orystardyń esim-soıymen atalatyna qynjylǵan.

Aıta keteıik, "Rýhanı jańǵyrý" baǵdarlamasynyń aıasynda jalpy Qazaqstan boıynsha kóshe ataýlary qazaqshalanyp jatyr. Mysaly, jaqynda Pavlodardaǵy Kýtýzov kóshesin Táýelsizdik dańǵyly dep ataý maquldandy. SHQO belsendileri Óskemendegi Voroshılov kóshesine Shákárimniń atyn berý kerek dep oblys ákimine hat jazdy.