2018 jyldyń 8 mamyr kúni bastalǵan Fransıadaǵy Kann kınofestıvalinde, kesh aıasynda «Akademıa solısov» memlekettik kamerlik orkestriniń súıemeldeýimen óner kórsetken tanymal skrıpkashy, Qazaqstannyń Halyq artısi Aıman Musaqojaeva men Dımash Qudaıbergen fransýz halqyn erekshe yqylasqa bóledi. Talantty ártister elimizdiń ókilderi retinde Astana men QazUÓÝ 20-jyldyq mereıtoıy qarsańynda ótetin «Eýrazıa» HKF tanytý maqsatynda óner kórsetti.
«Eýrazıa» kınofestıvali ̶ 1998 jyly negizi qalanyp, FIAPF (Halyqaralyq kınoprodúserler qaýymdastyǵy federasıasy) akredıtasıadan ótken jáne bedeldi brıtandyq International FilmGuide basylymy álemniń 35 tanymal kınofestıvalder qataryna engizilgen.
Halyqaralyq «Eýrazıa» kınofestıvaliniń Prezıdenti Aıman Musaqojaeva Kanndaǵy Qazaq mádenıeti keshinde bylaı dedi: «Eýrazıa» kınofestıvalinde otandyq fılmderdi keńinen taratý, kınojobalar men qyzmetterdi usyný jáne kelissózder júrgizýge múmkindik beredi. Qazaqstan rejıserleri tek otandyq kınorynokty ıgerip qoımaı, halyqaralyq kınojıyndarda da óz týyndylaryn batyl usynyp jatyr. Bıyl Kann kınofestıvaliniń «Erekshe kózqaras» baǵdarlamasynda Ádiljan Erjanov «Laskovoe bezrazlıchıe mıra» fılmimen qatysyp otyr. Al Jannat Alshanova «Kones sezona» fılmimen Sınemafondason baǵdarlamasynda baq synap otyr. Fılm sújetteri ár qıly: elimizdiń tarıhynan bastap búgingi problemalarǵa deıin qamtylǵan».
71-shi Halyqaralyq aıtýly kınofestıvaldegi ulttyq pavılonnyń jumys isteýi elimizdiń kınoóndiretin el ekendigin dáleldep, halyqaralyq yntymaqtastyqty nyǵaıtýǵa jáne otandyq kınoóndirýshilerdiń sheteldik kompanıalarmen jumys isteý múmkindikterin arttyrady jáne elimizdiń ımıjin kóteredi.
Osy oraıda aıta ketelik, byltyr Ulttyq Pavılonda kórmege qoıylǵan rejıser Erlan Nurmuhambetovtyń «Barymta» jobasy búginde «Qazaqfılm» kınostýdıasy men japonıalyq «Tokyo New Cinema» kınokompanıalarynyń qoldaýymen óndirilmek.
Sonymen qatar, Aıman Musaqojaeva Kann qalasynyń vıse-meri Frank Chikli myrzamen kezdesip, eki el arasyndaǵy mádenı, onyń ishinde kınematografıa men týrızm salasyn nyǵaıtýdy kelisti.
Saltanatty keshte sóz alǵan QR Mádenıet jáne sport mınıstrliginiń ókili Almat Súıinov qonaqtarǵa sálem berip, kınoǵa kórsetilip jatqan memlekettik qoldaý týraly aıtty: «Búginde memleket tek áleýmettik mańyzdy jobalarǵa emes, sonymen qatar avtorlyq kınoǵa da qarjylyq qoldaý kórsetedi. Sonyń arqasynda qazaq kınosy qarqyndy damyp keledi. Máselen, otandyq «Qazaqfılm» kompanıasy 20-dan astam fılmdi jaryqqa shyǵarady, al jeke stýdıalar 30 fılm túsiredi. Qazirde otandyq kórermender qazaqstandyq kartınalardy kórýge yntaly. Elimizdegi kınoteatrlarda usynylǵan fılmderdiń 15% otandyq fılmder».
Kınorynokta ashylǵan barlyǵy 230 pavılon bolsa, sonyń qatarynda turǵan otandyq pavılon óz týyndylaryn deńgeıli usynyp otyr. Otandyq jańa fılmderdiń prezentasıasynda treıleri kórsetilgen Asanáli Áshimov basty róldi somdaıtyn, rejıser Hýat Ahmetovtyń «Arýaq» kartınasy Kann kınofestıvaliniń qonaqtary, qalanyń basshylyǵy jáne festıváldiń kınokomıssıasy erekshe qyzyǵýshylyq tanytty. Sondaı-aq, kórmege Bolat Qalymbetovtyń «Talan», Ermek Tursynovtyń «Kınomehanık», Djef Vespanyń «Ámire» jáne basqa da fılmderi qoıylǵan.
Esterińizge sala keteıik, buǵan deıin Kann kınofestıvaliniń «Erekshe kózqaras» baǵdarlamasynda elimizdiń kınematografısteri jeńimpaz atanǵan. 1998 jyly Dárejan Ómirbaev «Kıller» fılmimen jáne 2008 jyly Sergeı Dvorsevoı «Túlpan» fılmimen basty júldelerge ıe bolǵan.
Elimizden barǵan delegasıa qatarynda memlekettik uıymdardyń ókilderi, shyǵarmashylyq ıntellegensıa, Qazaqstan kınosy men televızıasynyń beldi azamattary jáne Qazaq ulttyq óner ýnıversıtetiniń stýdentteri bar.
«Qazaqstannyń ulttyq pavılony» QR Mádenıet jáne sport mınıstrliginiń qoldaýymen «Rýhanı jańǵyrý» baǵdarlamasyn oryndaý maqsatynda ashylǵan.
