Búgin, Shymkent qalasyndaǵy "Túrkistan" saraıynda Qazaqstanǵa alǵash ret kelgen Amerıka Qurama Shtattarynyń «Deıton» zamanaýı bı teatry jáne qazaqstandyq «Qazyna» bı ansambliniń birlesken konserti ótti.
Shara barysynda sheteldik bı ujymyna Oblystyq mádenıet jáne tilderdi damytý basqarmasynyń Mádenıet jáne óner bóliminiń basshysy Sharafıeva Ǵalıa Alıkenqyzy Ońtústik Qazaqstan oblysynyń ákimi Túımebaev Janseıit Qanseıitulynyń arnaıy quttyqtaýy men syı-sıapatyn tabys etti.
"Bı teatry - kóp násildi amerıka halyqtarynyń ejelgi bı óneriniń dástúri men órnegin saqtap, óziniń rýhanı qazynasymen ushtastyra otyryp, halyqtyń tynys-tirshiligin, adamnyń tabıǵatqa kózqarasyn, dúnıetanymyn aıshyqtaıtyn óner retinde zamanaýı baǵytta órkendep, damýda.
Sizderdiń mýzyka yrǵaǵyn tereńnen sezinetin kásibı sheberlikterińizdi tabıǵattan berilgen erekshe syı dep bilemiz. Usynǵan bı qoıylymdaryńyzdaǵy jaz, etnografıalyq bı qımyldary zamanaýı modern elementterimen áserlenip, shyǵarmashyl trýppanyń sheberligin pash etti.
Búgingi bı keshi – «barlyq bıdi» biriktirýge qyzmet etetin erekshe mereke. Bul óner túri ár túrli ult ókilderiniń basyn qosyp, yntymaqtastyq pen beıbitshilikke baýlyp, eki el arasyndaǵy mádenı qarym-qatynasty odan ári nyǵaıta túsedi degen senimdemin"-dep, quttyqtaý hatta oblys basshysy izgi nıetin bildirgen.
Birlesken joba kórermenge erekshe áser qaldyrdy.
«Deıton» zamanaýı bı teatry (Dayton Contemporary Dance Company – DCDC) shyǵarmashylyqtarynyń túp-tamyry afroamerıkalyq mádenıetten bastaý alady.
«Deıton» zamanaýı bı teatrynyń negizin - Deıton qalasynyń Ogaıo shtatynda 1968 jyly bıshi, oqytýshy, horeograf, Mark-Artýr stependıasynyń laýreaty Djeraldına Blanden qalaǵan. Biregeı amerıkalyq bı teatry álemge tanymal.
Teatrdyń kórkemdik jetekshisi Debbı Blanden-Dıggs.
Olar ǵajaıyp bı nómirlerin qoıý arqyly álem boıynsha issapar barysynda teatr óneriniń jergilikti bilim berý mekemelerinde sheberlik sabaqtaryn ótkizip keledi.
«Qazyna» bı ansambli 1989 jyly qurylǵan. Ansabldiń uıymdastyrýshysy jáne kórkemdik jetekshisi QR Mádenıet qaıratkeri - Musabek Jarqynbekov. 2003 jyldan beri QR Mádenıet qaıratkeri, pedagogıka ǵylymdarynyń kandıdaty Záýre Ajıbekova jetekshilik jasap keledi. Ansámbldiń qorjynynda 70-ke jýyq fólklorlyq jáne zamanaýı janrda, TMD elderi jáne álem halyqtarynyń bıleri bar.
Aıta ketsek, «Deıton» zamanaýı bı teatry jáne qazaqstandyq «Qazyna» bı ansambliniń birlesýimen óńirimizdegi bı ujymdarynyń jetekshileri men múshelerine 13 mamyr kúni, saǵat 13:00-15:00 aralyǵynda "Exclusive" bı stýdıasynda sheberlik sabaqtary júrgiziledi.
