Búginde Almatyda 80-ge jýyq elıtaly páter jalǵa beriledi. Ondaı páterlerde turǵyńyz kelse, aı saıyn páter aqysynyń ózine keminde 1 mln teńge jumsaımyz. Árkimniń qaltasy kótere bermeıtin premıým-apartamenttiń eń qymbat bes túrin Krysha.kz jarıalaǵan eken. Nazarlaryńyzǵa usynamyz.

Besinshi oryn. Medeý aýdany AFD Plaza turǵyn úı keshenindegi tórt bólmeli páter. Turǵyn úı kesheni 2014 jyly turǵyzylǵan.

Páterdiń jalpy aýmaǵy 172 sharshy metrdi quraıdy. As úı, sanıtarlyq torap, balkon, lodjıa, parkıng jáne baqylaý kamerasy bar páterdiń qaýipsizdigi de joǵary deńgeıde qamtamasyz etilgen.

Al bul páterde turǵyńyz kelse, aı saıyn 1,5 mln tóleýge mindettisiz. Bir qyzyǵy, páter kishkentaı balalary bar otbasylarǵa jalǵy berilmeıdi eken.

Tórtinshi oryn. «Gornyı gıgant» aýdanynda ornalasqan «Edelveıs» turǵyn úı keshenindegi tórt bólmeli páter. Aýmaǵy 322 sharshy metrdi quraıdy.

Úı 2012 jyly salynǵan. İshinde qajetti jıhazdyń bári bar. Turǵyn úı keshenderine tán munda da kúzet, vıdeo baqylaý, vıdeo domofon,  kodtalǵan qulyp páterdiń qaýipsizdigin qamtamasyz etip turady. Al páter úshin aı saıyn 1 650 000 teńge tóleısiz.

Úshinshi oryn. 2015 jyly salynǵan Esentai Apartments keshenindegi bes bólmeli páter.

Jalpy aýmaǵy – 240 sharshy metrli páterde turǵyńyz kelse, aıyna 1,7 mln teńge tóleısiz.

Ekinshi oryn. Bostandyq aýdany «Mıras» yqsham aýdanynda ornalasqan «Jaılaý» turǵyn úı keshenindegi 4 qabatty páter.

Páterdiń jalpy aýmaǵy – 205 sharshy metr. Aıyna 2 mln teńge tólep turasyz.

Sonymen qatar, ekinshi orynda «Almaly» turǵyn úı keshenindegi úsh bólmeli páter de bar. Turǵyn úı kesheni 2013 jyly salyndy.

Jalpy aýmaǵy – 180 sharshy metr. Munda da aıyna 2 mln teńge tólep tura alasyz.

Reıtıńtiń kóshin bastap turǵan eń qymbat páter Esentai Apartments turǵyn úı keshenindegi eki qabatty penthaýs. Páter 18 qabatty úıdiń 12 qabatynda ornalasqan.

Jalpy aýmaǵy – 540 sharshy metr. Munda aıyna 4,2 mln teńge tólep tura alasyz.

Elıtaly páterlerdiń kóbi qalanyń taý jaq bóliginde – Medeý jáne Bostandyq aýdandarynda ornalasqan. Jalpy aýmaǵy keminde 150 sharshy metrdi quraıdy. Al páterlerdiń eń eskisi 2009 jyly salynǵan.