Búgin Ońtústik Qazaqstan oblysynyń ákimi Janseıit Túımebaev QR Bilim jáne ǵylym vıse-mınıstri Talǵat Eshenqulov pen M.Áýezov atyndaǵy Ońtústik Qazaqstan memlekettik ýnıversıtetiniń rektory qyzmetine jańadan taǵaıyndalǵan Darıa Qojamjarovamen kezdesti. Bul jaıynda Qamshy.kz aqparat agenttigi OQO ákimdiginiń baspasóz qyzmetine silteme jasap habarlaıdy.
Kezdesý barysynda taraptar Elbasy mindettegen joǵary bilim berýdiń sapasy men qoljetimdiligin arttyrý jaıyn jáne stýdentterdi jataqhanamen qamtý máselesin qozǵady.
Osy rette, aımaq basshysy Elbasy Joldaýyndaǵy jetinshi mindetinde bilim berýdiń jańa sapasyna toqtalǵanyn aıtyp, osy baǵytta óńirde atqarylyp jatqan jumystardy atap ótti. Sonymen birge ákim ýnıversıtet rektoryna jaýapty qyzmetindegi jumysyna sáttilik tilep, búginde M.Áýezov atyndaǵy OQMÝ Qazaqstandaǵy eń úzdik degen 20 joǵarǵy oqý oryndarynyń ishinde úshtikte ekenin atap ótti.
Aıta keteıik, Darıa Perneshqyzy JOO rektorlaryn taǵaıyndaý jónindegi respýblıkalyq konkýrstyq komısıanyń sheshimimen taǵaıyndaldy.
Qojamjarova Darıa - Tarıh ǵylymdarynyń doktory, profesor, Qazaqstan Respýblıkasynyń Ulttyq Ǵylym Akademıasynyń akademıgi. Ol 1962 jyly 22 shildede Jambyl qalasynda kópbalaly, qyzmetker otbasynda dúnıege kelgen.
1984 jyly S.M.Kırov atyndaǵy Qazaq memlekettik ýnıversıtetin «Tarıh» mamandyǵy boıynsha úzdik támamdap, eńbek jolyn 1984-1989 j.j. Jambyl pedagogıkalyq ınstıtýtynda oqytýshy qyzmetinen bastady. Al 1990-1995 jyldary Abaı atyndaǵy Almaty memlekettik ýnıversıtetiniń aspıranty, 1995-2001 jyldary M.H.Dýlatı atyndaǵy Taraz memlekettik ýnıversıteti «Tarıh» kafedrasynyń dosenti, 2001-2003j.j. kafedra meńgerýshisi, 2003 jyly M.H.Dýlatı atyndaǵy Taraz memlekettik ýnıversıteti pedagogıka fakúltetiniń dekany qyzmetterin atqarǵan. Al 2013 jyldan bastap Taraz memlekettik pedagogıkalyq ýnıversıtetiniń rektory bolǵan.
