Túlkibas aýdanyndaǵy «Aq shatyr» demalys ortalyǵynda Ońtústik Qazaqstan oblysynyń ákimi Janseıit Túımebaev mádenıet jáne óner qyzmetkerlerimen kezdesti, dep habarlaıdy Qamshy.kz aqparat agenttigi OQO ákimdiginiń baspasóz qyzmetine silteme jasaı otyryp.
Mádenıet jáne óner qyzmetkerleri kúnine oraı uıymdastyrylǵan basqosýda oblys ákimi óner azamattaryn kásibı merekemen quttyqtap, oblystyń rýhanı damýy men mádenı gúldenýine aıtýly úles qosyp júrgen azamattarǵa alǵysyn bildirdi.
«Elbasymyz Nursultan Ábishuly Nazarbaev táýelsiz elimizde mádenıettiń, ulttyq ónerimiz ben salt-dástúrlerimizdiń ósip-órkendeýine, ótkenin jańǵyrta otyryp jańasha baǵytta jumys jasaýǵa erekshe mán berip, únemi nazarda ustap kele jatqany barshamyzǵa aıan. Elimizdiń bolashaǵy jeke tulǵanyń mádenıettiligine baılanysty. Jeke tulǵa men qoǵamnyń saıası, eńbek, qarym-qatynas mádenıetin qalyptastyratyn arnaıy mekemeler men áleýmettik orta. Sol mekemelerdiń biri mádenıet oshaqtary bolsa, adamdy rýhanı azyqqa bóleıtin mádenıet pen óner qyzmetkerleri»,-aıtty J.Túımebaev.
«Mádenı qyzmet –mereıli mindet» taqyrybynda ótken merekelik keshte oblys mádenıetiniń damýyna súbeli úles qosqan 49 óner qyzmetkerleri «Oblysqa sińirgen eńbegi úshin» medalimen, oblys ákiminiń Qurmet gramotasymen jáne Alǵys hatymen, oblys ákiminiń arnaıy syılyǵy, oblystyq máslıhat gramotasy, «Nur Otan» OQOF partıasynyń alǵys hatymen marapattaldy.
Budan bólek, shara barysynda jazýshy, Qazaqstannyń eńbek sińirgen qaıratkeri Marhabat Baıǵut, Qazaqstannyń eńbek sińirgen ártisi, Jumat Shanın atyndaǵy akademıalyq qazaq drama teatrynyń ártisi Saparbaı Ótemisuly men arheolog, Á.Marǵulan atyndaǵy arhelogıa ınstıtýtynyń dırektory Baıtanaev Baýrjan, «Saq» kınostýdıasynyń dırektory Nýrıddın Patteev respýblıkalyq, halyqaralyq aqyndar aıtysynyń birneshe dúrkin jeńimpazy, «100 jańa esim» tizimine engen Bekarys Shoıbekov, aqyn, «Otyrar» oblystyq ǵylymı-ámbebap kitaphanasynyń ǵylymı qyzmetkeri Jantasova Zlıha men QR Mádenıet qaıratkeri, oblystyq opera jáne balet teatrynyń solısi Úralhan Seıilbekovalar Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń óńirde júzege asyrlýy jaıynda óz oılaryn aıtyp, mádenıet salasynyń damýy baǵytynda usynystaryn jetkizdi.
Búgin oblystaǵy mádenıet salasynda 5 myńǵa jýyq qyzmetker abyroıly jumys atqaryp keledi. Al halyqqa 736 mádenıet jáne óner mekemeleri qyzmet etýde. Atalǵan uıymdardyń qatysýymen ótken jyly 31 myńnan asa is-sharalar ótkizildi. İs-sharalar negizinen «EKSPO-2017» Halyqaralyq mamandandyrylǵan kórmesi, «Túrkistan - Túrki áleminiń mádenı astanasy» jyly jáne Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda uıymdastyryldy.
Sonymen qatar, «Rýhanı jańǵyrý» baǵdarlamalyq maqalasyndaǵy «Jahandyq zamanaýı Qazaqstandyq mádenıet» baǵyty boıynsha oblysymyzdyń mádenıeti men ónerin shetelderge tanystyrý maqsatynda osy jyly Sh.Qaldaıaqov atyndaǵy oblystyq fılarmonıanyń ánshileri men «Qazyna» bı ansambli Túrkıa Respýblıkasyndaǵy «Kastamoný – Túrki áleminiń mádenı astanasy» jylynyń ashylý saltanatyna jáne halyqaralyq Naýryz merekesine qatysyp, 6 memlekette óner kórsetti. Sonymen birge, oblysymyzdyń ónerpazdary Fınlándıada ótken «Jumbaq Jibek joly» halyqaralyq festıvaline qatysty. Al Italıanyń Pezaro qalasynda ótken XV «Chıtta dı Pezoro» halyqaralyq vokalıster baıqaýynda jas ónerpazdarymyz Karına Najmeddınova jáne Nurqanat Tapıvter İ orynǵa ıe bolyp, Italıada 1 jyl tegin oqýǵa shaqyrtý aldy.
