Almatyda Suńqar halyqaralyq shańǵy tramplıni kesheninde «Halyq barysy» týrnıriniń ashylý saltanaty ótedi.

Qazir atalǵan keshende saltanatty sharaǵa qyzý daıyndyq júrip jatyr.

Ashylý saltanatynda otandyq estrada juldyzdary «MýzArtLIFE», Qaırat Nurtas, «Órken», Marjan Arapbaeva, «Boztorǵaı» balalar qory, Ushqyn Jamalbek, Nurbolat Abdýllın, Ábdijappar Álqoja, Mádına Sádýaqasova, QR UQK shekara ýchılıshesiniń kýrsanttary óner kórsetedi.

Kesh barysynda sharshy top aldynda aıqasqa túsetin palýandar sherýi bolady.

Respýblıkalyq masshtabtaǵy mundaı týrnır Qazaqstanda birinshi ret ótkizilip otyr.

Óńirlerden kelgen 1 myńǵa jýyq palýan bas júlde 10 mln teńge úshin baq synasatyn bolady.

Ekinshi orynǵa taban tiregen sportshyǵa - 5 mln teńge, úshinshi jáne tórtinshi oryndarǵa 3 jáne 2 mln teńge beriletin bolady.

Beldesý  - ulttyq sport oıyndarynyń eń kóne túrleriniń biri. Kúrestiń bul túri Olımpıadalyq emes sport túri retinde álemdik jelige tirkelgen, IýNESKO tarapynan qoldaýǵa ıe.

«Saıysqa kez-kelgen 18-50 jas aralyǵyndaǵy kez-kelgen er adam qatysa alady. Salmaq turǵysynan shekteý joq. Saıys aldynda barlyq qatysýshylar medısınalyq baqylaýdan ótip, saqtandyrý qujattaryn toltyrady. Palýandar aýmaǵy 5*5 metr bolatyn  bolatyn alańqaıda beldesedi. Bir ýaqytta alańda 16 jup kúrese alady», - dedi saıystyń bas tóreshisi, «Qazaq kúresi» federasıasynyń bas hatshysy Baqdáýlet Sábıtov.

Munyń aldynda atalǵan saıystyń talaptary týraly jazǵan bolatynbyz.