Almatyǵa QR Premer-mınıstriniń orynbasary Asqar Jumaǵalıev jumys saparymen keldi. İssapar barysynda vıse-premer poshta sálemdemelerin jetkizetin zamanaýı drondardy testileý sharasyna qatysty.

Arnaıy apparat 200 metr bıiktikke deıin kóterilip, 15 mınýt shamasynda sálemdemeni shartty jerge jetkizdi.

Synaqtan sátti ótken jaǵdaıda drondar 4 kelige jýyq salmaǵy bar korespondensıalardy Qazaqstannyń shalǵaı aýdandaryna jetkizetin bolady.

«Byltyr shalǵaı aýdandarǵa sálemdeme jetkizýge múmkindik beretin arnaıy drondardy iske qosqan bolatynbyz. Osy tehnologıalardyń arqasynda alys aýyldarǵa 1600 kelige jýyq gazet-jornal kúnbe-kún jetkizilip turdy. Bul drondar 20000 shaqyrymǵa jýyq qashyqtyqqa ushyp úlgerdi. Endi bıyldan bastap birden 4 keli júk kótere alatyn drondardy testilep jatyrmyz. Jańa drondar bir baǵytta 70 kılometrge deıin usha alady», - dedi «Qazposhta» AQ Basqarma tóraǵasy Sáken Sársenov.

Onyń aıtýynsha, buryn shalǵaı aýyldarǵa sálemdeme jetkizý úshin arnaıy kólik pen jumysshy jaldaý kerek bolsa, endi bul shyǵyndarǵa ketken qarjyny sıfrlandyrý baǵytyna jumsaýǵa múmkindik týdy.

Vıse-mınıstr zamanaýı jetkizý tehnologıasyn joǵary baǵalady. «Bul tehnologıalar «Sıfrly Qazaqstan» baǵdarlamasy aıasynda óte mańyzdy. Sebebi, alystaǵy turǵyndarǵa jańa merzimdi basylymdardyń kúnbe-kún jetip turǵany óte qajet. Joba óte jaqsy. Jetkizý ýaqytyn, jol shyǵyndaryn únemdeýge bolady», -dedi A. Jumaǵalıev.

«Qazposhta» AQ Basqarma tóraǵasy Sáken Sársenovtiń aıtýynsha, ázirge Qazaqstanda Almaty, Qaraǵandy, Aqmola, OQO óńirlerinen 30 aýyl sálemdemelerdi dron arqyly alyp otyr.

Jyl sońyna deıin 159 eldi mekendi qamtý josparda bar.

Sonymen qatar, vıse-premer Asqar Jumaǵalıev Qazposhtanyń Almatydaǵy sıfrlyq ofısinde boldy.

Munda vıse-mınıstrdiń delegasıasy jasandy ıntelleket tehnologıasymen tanysty.

Asqar Jumaǵalıevtyń tóraǵalyǵymen elektrondy komersıa nemese blokcheın tehnologıasyn paıdalaný týraly jıyn ótpek.

Otyrys barysynda QR Ulttyq bankiniń qysqa nottardy ornalastyrýdyń «Invest Online» baǵdarlamasy týraly aıtylady.