Talǵat Rysqulbek bastaǵan "Jeltoqsan rýhy" qoǵamdyq birlestiginiń bir top belsendisi NARHOZ ýnıversıtetinen Turar Rysqulovtyń esimin alyp tastaýǵa qarsylyq bildirip, ýnıversıtet aldyna sherýge keldi. Olar qaıratkerdiń esimin joǵary oqý ornyna qaıta berýdi talap etýde, dep jazady Qamshy.kz aqparat agenttigi. 

«Búgingi jınalýymyzdyń sebebi – osydan birneshe jyl buryn myna NARHOZ ýnıversıteti satylyp ketken eken. Keıinnen bul ýnıversıtetten Turar Rysqulovtyń atyn alyp tastady. Bilýimshe, 2016 jyly alynyp tastaldy. Bir qyzyǵy, Úkimettiń qaýlysymen bul joǵary oqý ornyna Turar Rysqulovtyń aty beriledi de, al onyń esimin alyp tastaǵan kezde eshqandaı da qaýly shyqpaıdy», - deıdi "Jeltoqsan rýhy" qoǵamdyq birlestiginiń tóraǵasy Talǵat Rysqulbek.

NARHOZ ýnıversıtetiniń aldyna jınalǵan bir top belsendi óz shaǵymdaryn aıtyp kelgenimen, joǵary oqý ornynyń basshylyǵy bolmady.

«Elbasymyz «Rýhanı jańǵyrý» degen jap-jaqsy bastamany kóterdi. Biraq biz qalaı rýhanı jańǵyramyz? Eger de osyndaı elin, jerin qorǵap, halqy úshin qurban bolǵan azamattardyń esimin osylaı alyp tastap jatsa. Bul Joǵary oqý ornyn satqan adam, kezinde Turar Rysqulovty satqan adamnyń urpaǵy bolýy múmkin», - deıdi Talǵat Rysqulbek.