Qaraǵandyda aýyzashardan shyqqan 20 adam astan ushynyp, aýrýhanaǵa tústi. Jaǵdaıy aýyr úsheýin tipti, jansaqtaý bólimine jatqyzýǵa týra kelgen. Aýyzashar bergen úıdiń ıeleri bolsa bazardan alynǵan etten ushyndyq degendi aıtady. Qazir olardyń jegen astary zerthanada tekserilip jatyr dep málimdedi KTK telearnasy.

Osydan 3 kún buryn aýyzysharǵa shaqyrylǵandar búgin búk túsip aýrýhana tóseginde jatyr. Barlyǵy da sol otyrystan keıin ózderin jaısyz sezinipti. Eresekterdiń aǵzasy alǵashynda syr bermese, kishkentaı balalardyń birden ishi ótip, ystyǵy kóterilgen. 

Jansaqtaý bóliminde jatqan kishkene balalardyń jaǵdaıy turaqty túrde aýyr dep baǵalanyp otyr. Bárine tıisinshe em-dom jasalyp jatyr eken. Sondyqtan qatty alańdaýǵa negiz joq, betterin beri qaratamyz deıdi dárigerler. 

«Qajetti em-domnyń barlyǵy jasalyp jatyr. Jaǵdaılar turaqtandy. Bir naýqasty erteń jansaqtaý bóliminen jalpy palataǵa shyǵaramyz. Naýqastardan qajetti saraptamalardyń barlyǵy alynyp, zerthanaǵa jiberildi», - deıdi dáriger Botakóz Jantaqbaeva.

Al saraptama qorytyndysy 3-4 kúnde shyǵýy tıis. Mamandar ishti ótkizgen et bolǵan kúnniń ózinde de aýyzashar bergender ol etti alǵan jerdi kórsetip, dáleldeýi kerek. Óıtkeni ettiń bazardan emes, basqadan alynbaǵanyna da kepildik joq deıdi olar.