Taıaýda biz bir demalysymyzdy paıdalanyp, Astana mańyndaǵy Sileti ózenine qarmaq saldyq. Jaǵalaýda «Alabuǵa, aq balyq – qarmaǵymdy qap, balyq!» dep otyrǵanda, sol jerdegi ushqat túbinen qazyp alǵan jaýynqurtymyzdyń dámin saýsaqtaı maıshabaqtar ǵana tatyp kórdi. Odan basqa túk joq. Úsheýin ustap, sýǵa qaıta jibere salǵannan keıin bazardan satyp ala shyqqan dáý sazanymyzdy qýyryp jep, keri qaıtýymyzǵa týra keldi.

Sodan keıin Esil ózeniniń Maksımovka aýyly jaǵynda aǵyp jatqan tusyna baryp toqtadyq. Bunda da sol... Shabaq aýlap, sazan jep qaıtqannyń esh qyzyǵy joq eken, táıiri!

Astanadaǵy qymbat kólikterdiń kóbisi sol jerde tur. Oryndyqqa jaıǵasqan orystar men tolarsaqtan saz keshken qazaqtardyń árqaısysynda keminde 3-4 qarmaqtan bar. Kúmisshe jaltyraǵan aq shabaqtardy birinen soń birin ilip alyp, shelekterine sholp-sholp etkizýde. Ósip-ónsin degen aıaýshylyqtan ada eken shetterinen!

Al bizdiń jaǵdaı belgili... Taǵy da urty qanaǵan úsh shabaqpen «kelesi jyly kezdeskenshe» dep qoshtasa saldyq. Ǵaıyptan taıyp alabuǵa, kókserke, shortan, tuqy syndy balyqtardyń irileý bireýi kezige qalsa, sol turǵan jerimizde kishigirim toı jasap jiberýge ázir edik. Bolmady. Jalańdaǵan jalmaýyz qarmaqtar kókke shanshylyp, kúnge shaǵylysyp, ózenniń ózegin tinte timiskileýden bir tynbasa, myna maıshabaqtardyń ózi quryp ketýi múmkin sıaqty kórindi. Qatarymyzǵa sol aýyldan qosylǵan jol bastaýshymyz: «Áneýgúni osyndaı shabaqtardyń jarty qabyn alǵanbyz», – dep qoıady. Áne, kerek bolsa! Ár aýlaýshy sóıtip qap-qabymen óńgerip ákete berse, elordanyń sý qoımalaryna byltyr jiberilgen 41 mıllıon shabaqtyń nesi qalady-eı?!.

Iá, byltyr Aýyl sharýashylyǵy mınıstrliginiń bastamasymen Esil ózenine qala ishindegi jaǵajaıdan 41 mıllıon tuqy balyǵynyń shabaqtary jiberilgen. Elimizdiń «Qyzyl kitabyna» enip ketken bulardyń bári – «Maıbalyq» kútimbaǵynyń «túlekteri». Sol sátte: «Aqmola oblysynyń negizgi sý kózderi – Nura men Esil ózenderi jáne Vácheslav sý qoımasyna osy kezge deıin tuqy shabaǵynyń 50 mıllıondaıy jiberildi», – dedi ASHM Aqmola oblystyq ınspeksıa jetekshisiniń orynbasary Nyǵmet Qaýashev. Ótkende qarasaq, myjyraıǵan bir shal qarmaq qaltqysynyń dirilinen úmit kútip, tuqylardyń týra sol Qaýashevtiń aıaly alaqanynan sýsyǵan tusynda otyr. Eee de!

Sondaı-aq, Astana qalasy ákimdiginiń «Jas Nur» óndiristik-sharýashylyq kásiporny 2013 jyly «Qoıandy» sý qoımasyna repýs balyǵynyń shabaqtaryn jiberip edi. Sonda sol mekemeniń mamany Jarylqasyn Ábdikerimovtiń bizge zańsyz balyq aýlaýshylyqtyń aldyn alatyndaryn aıtqany esimizde. Ár ózennen úsh shabaqty alyp-salyp úırene bastaǵan qaıran basymyz ótkende ol sý qoımasynyń da jaǵalaýyn shıyrlap úlgerdi. Onda da tyıym-syıymnyń bir rettik yrymy baıqalmady. Tipti, sý jaǵasynda sonda kelip demalatyn qalanyń salaq turǵyndarynan qalǵan qoqystar ybyrsyp jatyr...

Eń soraqysy, bıylǵy naýryzda Astana irgesindegi Sarqyrama toǵanynda maıda shabaqtar jappaı qyryla bastady. Sý betine qalqyp shyqqan olarǵa qaýiptiń qaıdan kelgeni belgisiz. Sebebin anyqtaý úshin ekologtar sýdan synama alyp, zerthanaǵa jóneltti. Ázirge onyń nátıjesi jarıalanǵan joq. Bir biletinimiz, Aqmola oblysynyń Selınograd aýdany boıynsha osyndaı qaraýsyz jatqan 16 toǵan bar. Olardyń báriniń jaǵdaıyn baqylap otyrýǵa jergilikti bıliktiń qaýqary da, qarajaty da jetpeıtin kórinedi. Bul degenińiz – balyq sharýashylyǵymen aınalysamyn deýshilerge taptyrmas múmkindik. Biraq, qazir oǵan da qulshynyp otyrǵan bir adam baıqalmaıdy.

Áıteýir, keleshektegi keı áńgimemizdi «shabaqqyrǵan zamanda» dep bastap otyrmasaq jarar edi...

Erkeǵalı BOLATULY