QR Mádenıet jáne sport mınıstrligi tapsyrysy boıynsha «Tanaris Production» kınokompanıasy túsirgen «Úzilmegen úmit» kórkem fılmi Reseıde ótken Halyqaralyq «Svet mırý» kınofestıvalinde Bas júldeni jeńip aldy, dep habarlaıdy Qamshy.kz aqparat agenttigi.   

«Úzilmegen úmit» fılminiń rejıserleri – Serik Ábishev jáne Rýslan Magomadov.

Atalǵan fılmdi halyqaralyq kınofestıvalderde kórsetip, nasıhattaýdy Sh.Aımanov atyndaǵy «Qazaqfılm» AQ júzege asyryp otyr. 

- Bizdiń fılmimizge joǵary baǵa bergen «Svet Mırý» festıvaline jáne onyń qazylar alqasyna alǵysym sheksiz. Fılmniń teń rejıseri Rýslan Magomadovpen, sondaı-aq kartınanyń túsirý tobymen birlesip meıirimge toly,  adamdardyń júrekterine jylý uıalatyp, kóńilderin nurlandyratyn fılm túsirýge tyrystyq, - dedi rejıser Serik Ábishev.

Fılmdegi basty rólderdi Almaty jáne Almaty oblysy balalar úıiniń tárbıelenýshileri, sonymen qatar Ońtústik Koreıanyń balalary somdady. Kartınanyń negizgi túsirý jumystary Shyǵys Qazaqstan oblysynda ótken. Fılmniń mýzykasyn elimizdiń tanymal kompozıtory Qýat Shildebaev jazǵan. Al, fılmge mýzyka jazý barysynda Batyrhan Shúkenovtiń saksofonmen oryndaǵan ımprovızasıasy negiz bolǵan.

Esterińizge sala ketsek, atalǵan fılm eń alǵash Germanıada ótken 64-shi Mangeım-Haıdelberg halyqaralyq kınofestıvaliniń negizgi baıqaýynda kórsetilgen bolatyn. 2016 jyly fılmde basty róldi somdaǵan jas akter Amageldi Qusaıynov Halyqaralyq «KınoMalySHok» kınofestıvalinde «Úzdik bala róli» júldesimen marapattalǵan.