Reseı ombýdsmeni qazaqstandyq Tomırıs Baısafanyń ólimine qatysty tergeý jumystaryn baqylaýyna alýǵa  ýáde berdi. Bul týraly Qazaqstandaǵy adam quqyǵy jónindegi ýákiletti ókil Asqar Shákirov habarlady, dep jazady tengrinews.kz.

«Qaıǵyly oqıǵaǵa baılanysty qylmystyq is qozǵaldy. Tergeý jumystaryn Máskeýdiń tergeý organy júrgizip jatyr. Tomırıstiń anasy bizdiń ókilmen sóılesti. Olardyń oıynsha, tergeý jumystary ádil júrip jatqan joq. Naqty prosesýaldyq zań buzýshylyqtar boldy degendi alǵa tartyp otyr. Tomırıstiń ata-anasynyń oıynsha tekserý jumystary obektıvti júrip jatqan joq. Ony jalǵyz kýágerden túsinikteme alǵanynan ańǵarýǵa bolady», - dedi Shákirov IýNISEF konferensıasynda.

Qazaqstandyq ombýdsmen tergeý jumysyna aralasýdy kózdemeıtinin aıtyp ótti.

«Tergeý ádil júrý úshin áriptesime ótinish bildirdim. Keshe reseılik ombýdsmen Tatána Moskalkovamen  sóılestim. Ol atalmysh isti óz baqylaýyna alýǵa ýáde berdi», - dedi Shákirov.

Marqumnyń ata-anasy – Darhan Qojabergenov pen Janna Ahmetova reseılik mamandardan ádiletti ári obektıvti tergeýdi talap etip otyr. Reseılik tergeý mamandarynyń boljamynsha, qyz óz-ózin óltirgen. Alaıda ata-anasy bul derekke senýden bas tartty.

Esterińizge sala keteıik, 2018 jyldyń sáýir aıynda Tomırıs Baısafa Máskeý memlekettik halyqaralyq qatynastar ınstıtýtynyń 4-shi qabatyndaǵy dárisqananyń terezesinen qulap ketken.

1997 jylǵy Tomırıs tańǵy 4.00-te qaıtys boldy. Tergeýshiler sáýirde  atalmysh iske qatysty qylmystyq is qozǵaǵan. Tergeýshilerdiń málimetinshe, qyz birden aýrýhanaǵa jetkizilgen. Qaıǵyly oqıǵa 13 sáýirde boldy.

Tomırıs halyqaralyq ekonomıkalyq qatynastar kafedrasynyń 4-shi kýrsynda oqyǵan. Ol úzilis kezinde terezeden qulap ketken. Beıresmı aqparatqa sáıkes, ony ıterip jibergen.