Ońtústik Qazaqstan oblysynyń aýmaqtaryn kórkeıtý, kógaldandyrý jáne sanıtarlyq tazalaý jónindegi is-sharalardy ótkizý týraly oblys ákiminiń №53 qaýlysyna sáıkes, Maqtaral aýdanynda birneshe aptadan beri sanıtarlyq tazalyq jumystary men senbilikter ótkizilýde.

Búgin aýdan ákimi Jamantaı Beısenbaevtyń bastamasymen "Maqtaral - tazalyq aınasy" atty jappaı senbilik uıymdastyrylyp, aýdandy abattandyrý jumystary jalǵasyn tapty.

Senbilikke barsha qala, kent, aýyldyq okrýgterden 8 myńnan asa adam jáne 32 tehnıka qatysyp, 421 tonna retsiz kúl-qoqys shyǵaryldy. 83 shaqyrym kósheniń boılary, 22 shaqyrym aıaqjoldar tazalanyp, retke keltirildi. Sonymen qatar, 9 balalar alańshalary, 8 sport alańshalary men 11 avtobýs aıaldamalary áktelip, syrlandy.

Odan bólek, 110 kópqabatty úılerdiń aýmaqtary men kireberisteri, 2671 sharshy metr úı irgelik aýlalary retke keltirilse, 1,775 shaqyrymdy quraıtyn ırrıgasıalyq júıeler qoqystan aryldy.

Aıta keteıik, búgingi tazalyq jumystarynyń arqasynda aýdannyń 18 jerinde bereketsiz jatqan kúl-qoqystar joıylyp, 8543 dana taldar ákteldi. Sondaı-aq, 0,675 gektar saıabaq, 0,125 gektar skverler, 21 shaqyrym kanaldar men kópirler tazalandy.