Maqtaral aýdanynyń eńbekqor dıqandary qaýyn-qarbyzben qatar kókónis ónimderin de eksportqa shyǵara bastady. Qazirgi tańda aýdanda erte egilgen 350 gektar kókónis daqyldary pisip jetilip, egistik alqaptarynda terim jumystary qyza túsken. Eń bastysy – egistikten alynǵan ónim der kezinde tıimdi baǵaǵa saýdalanyp, dıqandar shyǵynǵa ushyramaýy tıis. Ol úshin aýdan ákimdigi tarapynan barlyq kómekter kórsetiletin bolady. Búgin bul týraly birneshe sharýa qojalyǵyndaǵy terim jumystarynyń barysymen tanysqan Maqtaral aýdanynyń ákimi Jamantaı Beısenbaev málim etti.
Aýdan basshysy aldymen "Tahırjan" sharýa qojalyǵyna baryp, baklajan ónimderin jınaý naýqanynyń barysymen tanysty. Sharýa qojalyqtyń tóraǵasy Arystan Saparov bıyl 1 gektarǵa baklajan, 1 gektarǵa júgeri, 9 gektar jerge maqta egipti. Byltyr 1 gektardan 27 tonna baklajan ónimin alǵan sharýa bıyl da bul daqyldan joǵary ónim alýdy kózdep otyr. Atalǵan qojalyq baklajannyń 1 kelisin deldaldarǵa 300 teńgeden satyp jatyr eken.
«Baklajan - kúndelikti turmysqa óte qajetti ónimderdiń biri. Quramynda dárýmender óte kóp. Mine, eginshilikti ártaraptandyrýdyń arqasynda dıqandarymyz buryn sońdy ekpegen kókónistiń osyndaı túrlerine bet bura bastady. Dıqandarymyz osylaısha otandyq naryqpen qatar, Reseıge baklajan ónimderin eksporttaýda " - dedi Jamantaı Qanaıuly.
Munan soń aýdan ákimi "Israıl" sharýa qojalyǵynyń jumys barysymen tanysty. Qojalyqtyń tóraǵasy Altynbek Toraev bıyl 0,5 gektar jerge bolgar buryshyn egip, alǵashqy ónimderin shyǵara bastapty. Bolgar buryshynyń kelisin 400 teńgeden satyp jatyr eken. Sondaı-aq, ol bıyl qıar men qyzanaq egip, joǵary ónim alýda kózdep otyr.
Aıta keteıik, byltyr maqtaraldyq sharýalar 3877 gektar jerge kókónis daqyldaryn egip, 89689 tonna ónim alǵan bolatyn. Al bıylǵy kórsetkish munan da joǵary bolady degen senim bar.
