Túrkıa prezıdenti Taıyp Erdoǵan eldegi "Uber" taksı qyzmetiniń toqtaǵanyn málimdedi, dep jazady Qamshy.kz aqparat agenttigi Daily Sabah - qa silteme berip.
"Endi Uber bıznesi joq. Ózimizdiń taksı júıemiz bar, al jeke taksılerdiń túrik taksı júrgizýshileriniń bıznesin buzýǵa jol bermeımiz", - dedi Erdoǵan.
"News Turk"- tiń habarlaýynsha, kóktemde Stambýldyń taksı júrgizýshileri men Uber tasymaldaýshylary arasynda teketires bolyp, artynsha kıkiljiń úlken daýǵa aınalǵan. Taksı júrgizýshileri narazylyq bildirgen.
Uber Túrkıada 2014 jyldan beri jumys jasap keledi. Sońǵy derekterge súıensek, elde kólikpen qyzmet kórsetýshilerdiń sany shamamen 5 myńǵa jetken. Uber XL shaǵyn avtobýstary jergilikti turǵyndar men týrıser arasynda eń qolaıly kólik túri bolyp úlgergen edi.
Qazaqstanda Uber jáne Iandeks taksı qyzmeti naryqtaǵy óz ornyn ustap tur. Osy sebepti taksı parkteriniń tabysy ekinshi jyl qatarynan tómen bolyp otyr.
