Qurlyq áskerleri Áskerı ınstıtýtynyń desanttyq-shabyldaýylshy bólimshelerin jáne barlaý bólimshelerin basqarý mamandyǵy boıynsha bilim alyp jatqan birinshi kýrs kýrsanttary MI-17 tikushaǵynan ózderiniń alǵashqy parashútpen sekirýlerin oryndady. - Kýrsanttar áýege alǵash kóteriler aldynda olarmen teorıalyq jáne jer ústi daıarlyǵy ótkizildi.
Bolashaq ofıserler Qurlyq áskerleri Áskerı ınstıtýtynyń áskerı jáne arnaı barlaý kafedrasynyń tájirıbeli oqytýshylarynyń jetekshiligimen parashút júıeleriniń taktıkalyq-tehnıkalyq sıpattamalaryn, kúmbezdiń ashylýyna deıingi jáne ashylǵannan keıingi parashútshilerdiń is-qımyldaryn úıretti, jerge qoný tártibin pysyqtady. Synaq tapsyrǵannan keıin ǵana kýrsanttar sekirýge ruqsat aldy, deıdy 3 rota komandıri aǵa leıtenant Kazbek Ismaılov. Bul joly kýrsanttar birinshi ret qarýsyz jáne jol dorbasyz sekirdi. Bolashaqta qarýmen jáne tolyq jabdyqtarymen kýrsanttar túnde, kúrdeli jergilikti jer jaǵdaıynda nemese sýǵa sekiretin bolady.
Kýrsanttarmen birge tikushaqtan 1 batalón 3 rota basqarmasy birge parashútpen sekirdi. 1 batalón 3 rota komandıriniń tárbıe jáne ıdeologıalyq jumystar jónindegi orynbasary aǵa leıtenant Erkebulan Narynbaevtyń aıtýy boıynsha: - Kýrsanttar ózderimen birge bir tikushaqta parashútpen sekirýge daıyn komandırlerin kórgen kezde olardyń moraldyq-psıhologıalyq jaǵdaıy aıtarlyqtaı nyǵaıyp, jaýapkershiligi artady, óz kúshterine degen senimi nyǵaıady. Desanttaý sátti ótkenin, barlyq kýrsanttar qoıylǵan tapsyrmalardy oıdaǵydaı oryndaǵandaryn aıta ketken jón. Otan qorǵaý isin ózderiniń basty mamandyqtary dep biletin desantshy kýrsanttar aldaǵy ýaqytta talaı belesti baǵyndyrary sózsiz.
