Ońtústik Qazaqstan oblysynda «QAZAQSTAN» ulttyq telearnasynyń «Men qazaqpyn» televızıalyq mega jobasynyń aýdanaralyq irikteý kezeńi aıaqtaldy. Mamyr aıynyń 17-juldyzynda Báıdibek, Sozaq aýdandarynan bastaý alǵan saıys aımaqtaǵy 14 aýdandy tolyqqandy qamtyp, 29-mamyr kúni Shymkenttik ónerpazdardy saralaýmen qorytyndylandy. Atalǵan jobaǵa oblys ákimi Janseıit Túımebaev qoldaý bildirip, baıqaýdyń óńirde joǵary deńgeıde ótýine muryndyq bolyp otyr. Búgin bul týraly OQO óńirlik komýnıkasıalar qyzmetinde ótken brıfıńte «Ontustik» telearnasynyń dırektory Baýyrjan Berdimuratov málimdedi. 

Qazaq xalqynyń tól óneri, sonyń ishinde jyr-terme men kúıdi búgingi zaman talabyna saı jańartyp, nasıhattaýǵa baǵyttalǵan jobada 18 ben 40 jas aralyǵyndaǵy ónerpazdar baq synady. 

Baspasóz máslıhatyna qatysqan Oblystyq mádenıet jáne halyq shyǵarmashylyǵy ortalyǵynyń dırektory Nurlan Ádilhanovtyń aıtýynsha, baıqaýǵa 14 aýdan men Shymkent qalasynan jalpy 213 úmitker qatysqan.

«Oblystaǵy barlyq aýdannan dara shaýyp úzdik shyqqan 40 ónerpaz kelesi kezeńge joldama aldy. Endi 5-maýsym kúni Shymkent qalasynda ótetin baıqaýdyń qorytyndysy boıynsha respýblıkalyq jarysqa úsh ónerpaz ǵana joldama alady. Oblystyń jarysta ár sala boıynsha arnaıy mamandar tórelik jasap, kil myqtylardy suryptaıtyn bolady», - dedi Nurlan Ydyrysuly. 

Ulttyq jobanyń óńirdegi irikteý kezeńderi, baıqaýǵa qatysyp jatqan ónerpazdar, jeńimpazdar týraly aqparat jáne jalpy jarystyń ótý barysyn «Ontustik» telearnasy udaıy tikeleı efırde kórermenderge jarıalap keledi. 

Aıta keterligi, jobanyń respýblıkalyq aınalymynda jeńiske jetken jeńimpazdar "Jyldyń eń úzdik dástúrli ánshisi", "Jyldyń eń úzdik termeshisi" jáne "Jyldyń eń úzdik kúıshisi" atalymdary boıynsha marapattalatyn bolady.