Premer-mınıstr Baqytjan Saǵyntaev Qazaqstandaǵy menıngıtke qarsy jumysty kúsheıtýdi talap etti, dep habarlaıdy Qamshy.kz aqparat agenttigi.
Astanada kezekti Úkimet otyrysy ótip jatyr. Jıynda QR densaýlyq saqtaý mınıstri Eljan Birtanov menıngokok ınfeksıasy jaıynda baıandama jasady.
«Elimizde 2018 jyldyń basynan beri ólim qaýpi joǵary bakterıalyq menıngokok ınfeksıasymen 593 adam qaraldy. Olardyń ishinde 213 adam emdeýge jatqyzyldy, al olardyń ishinde 58 adamda menıngokok ınfeksıasy rastaldy. 14 jasqa deıingi balalardyń sany – 21, qazirgi tańda 10 naýqas aýrýhanadan emdelip shyǵaryldy, 21-i áli emdelý ústinde. Adam ólimi jaǵdaıy tirkeldi, onyń ishinde Almaty oblysynda 4, Qyzylorda oblysynda 1, OQO-da 2 jáne Almaty qalasynda 6 adam kóz jumdy. Ókinishke oraı, qaıtys bolǵan naýqastardyń arasynda balalardyń sany – 6.
Osyǵan deıin elimizde menıngokok ınfeksıasymen ólim deńgeıi jyl saıyn ózgerip otyrdy, eń tómen jaǵdaı – 2016 jyly 7 adam qaıtys bolǵan, al eń joǵarǵy kórsetkish – 2015 jyly 25 adamnyń ólimi tirkelgen.
Qazaqstan Respýblıkasynda menıngokok ınfeksıasymen syrqattanýdyń ortasha deńgeıi – 100 myń turǵynǵa shaqqanda 2,1. Qazir Qazaqstandaǵy syrqattaný deńgeıi ár 100 myń turǵyndarǵa 0,3-ti quraıdy.
Almaty qalasynda menıngokok ınfeksıasynyń ortasha deńgeıi 4,0 bolsa, qazir Almaty qalasynda 100 myń turǵynǵa shaqqanda 1,7-ni quraıdy», - dedi mınıstr óz baıandamasynda.
Onyń aıtýynsha, Dúnıejúzilik densaýlyq saqtaý uıymynyń epıdemıalardy basqarý jónindegi nusqaýyna sáıkes, 2018 jyly epıdemıalyq deńgeıdiń kórsetkishi aptasyna 100 myń turǵynǵa shaqqanda 3 jaǵdaıdy jáne 100 myń turǵynǵa shaqqanda 10 jaǵdaı eken.
Mınıstr Birtanov aýrý jaǵdaıynyń deńgeıi osy kórsetkishten asqanda arnaıy sharalar jasalyp, halyqqa vaksınalar egiletinin aıtyp ótti.
«Respýblıka halqynyń sanyna sáıkes profılaktıkalyq is-sharalardy júrgizetin shekti kórsetkish – aptasyna 540 jaǵdaı jáne epıdemıalogıalyq shek – aptasyna 1800 jaǵdaı, ol kezde menıngokok ınfeksıasyna qarsy halyqtyń vaksınamen jappaı egilýi jáne shekteý sharalary engizilýi qajet. Qazirgi tańda Almaty qalasynda qala halqynyń sanyna sáıkes, bul kórsetkish 54 jáne 180 jaǵdaıdy quraıdy, al aǵymdaǵy jyly jaǵdaılardyń eń joǵarǵy kólemi 21-27 mamyr aralyǵynda tirkelgen. Respýblıka boıynsha aptasyna 15, Almaty qalasy boıynsha 13 jaǵdaı tirkeldi.
Almatydaǵy syrqattaný deńgeıi shektik deńgeıden kórsetkishinen tómen», - dedi mınıstr.
Sonymen qatar Eljan Birtanov menıngokok ınfeksıasymen syrqattaný boıynsha jaǵdaıdy turaqtandyrý úshin óńirlerde respýblıkalyq arnaıy shtabtar qurylǵanyn jetkizdi.
"Olar kúndelikti jaǵdaıdy turaqtandyrý boıynsha qabyldanatyn is-sharalardy júzege asyrýda. Al bıyl 31 mamyrda menıngokok ınfeksıasymen syrqattanýdy turaqtandyrý jónindegi keshendi is-sharalar jospary bekitildi. Qarym-qatynasta bolǵan 433 adam anyqtalyp, olarǵa antıbıotık profılaktıkasy taǵaıyndaldy. 100 paıyz naýqas búginde profılaktıka qabyldap jatyr. 3438 adam kýrsty aıaqtady, búginde 698 adam osy profılaktıkalyq kýrsty jalǵastyrýda. Almaty qalasy men Almaty oblysyndaǵy mektepke deıingi balalar mekemelerinde kóptegen is-sharalarǵa shekteý qoıyldy, 2018 jylǵy jazǵy saýyqtyrý lagerleriniń ashylýy 18 maýsymǵa deıin shegerildi. Halyq arasynda BAQ jáne áleýmettik jeliler arqyly túsindirý jumystary júrgizilýde. Sondyqtan respýblıkada menıngokok ınfeksıasy boıynsha qalyptasqan jaǵdaı karantın engizýge jáne halyqqa jappaı vaksınasıalaý júrgizý qajet bolatyn shekti deńgeılerden aspaıdy. Qazirgi kúnde Densaýlyq saqtaý mınıstrligi Densaýlyq saqtaý basqarmalarymen birlesip qabyldap jatqan sharalar halyq arasynda menıngokok ınfeksıasymen syrqattaný boıynsha jaǵdaıdy turaqtandyrý úshin jetkilikti dárigerlik uıymdar men qajetti dári-dármekter, bári daıyn, barlyq óńirlerde daıyndyq jumystary júrgizilýde», - dedi mınıstr.
Densaýlyq saqtaý mınıstri Almaty qalasyndaǵy menıngokok ınfeksıasyna qatysty búgin Almaty men Almaty oblysyna saparǵa shyǵýdy josparlap otyrǵanyn da málimdedi.
Premer-mınıstr Baqytjan Saǵyntaev óz kezeginde bul másele halyq arasynda úlken alańdaýshylyq týdyryp otyrǵanyn aıtyp, densaýlyq saqtaý mınıstri Eljan Birtanovqa birshama eskertý jasady.
«Jaı ǵana aıtyp ótý az, aqparat-túsindirme jumystaryn jandandyrý qajet. Áleýmettik jelilerde kóp talqyǵa túsip jatyr. Sizderdiń taraptaryńyzdan aıtylyp jatqan máseleler birine jetse, ekinshisine jetip otyrǵan joq. Sondyqtan jańa ózińiz aıtyp otyrǵan shtabtardy qursańyz, olardyń jumysyn jarıa túrde júrgizý qajet. Árbir oblystarda atqarylyp jatqan jumystardy jarıa túrde ashyp aıtyp, halyqqa jetkizip otyrý qajet. Dıagramda ózińiz qaı jyly kóp bolǵanyn, qaı jyly az bolǵanyn kórsetip otyrsyz. Bıyl da kóp talqylaýǵa túsip jatyr, sol sebepti aqparattandyrý jumystaryn jandandyrý kerek.
Ekinshi másele – vaksınaǵa kóp kóńil bólinip jatyr. "Ony egý kerek pe, álde ekpeý kerek pe?", - degen suraqtar bar. Mysaly, keshe maǵan qabyldaýǵa úlken kásiporynnyń basshysy kelip: "Jumysshylardyń barlyǵyna egý jumysyn júrgizeıin be, álde qajet emes pe?", - dep surap jatyr. Olarǵa bul jaıynda aıtyp jetkizi,p túsindirip jatqan eshkim joq. Vaksınany óz erkimenen alý máselesi halyqtyń arasynda kúnnen-kúnge kóterilip kele jatyr. Al baǵasy óte qymbat. Bir oblysta 40 myń, bir oblysta 20 myń turady. Osyndaı jaǵdaı bolyp jatqan kezde mınıstrliktegiler, ákim myrzalar, sizder de jaǵdaıdy baqylaýǵa alyp, kereginshe kómek kórsetip, vaksınalardyń baǵasyn túsirý qajet. Panıka jasamaý kerek», - dedi Úkimet basshysy.
