Memleket basshysy Mańǵystaý oblysynyń ákimi Eraly Toǵjanovty qabyldady, dep habarlaıdy Qamshy.kz aqparat agenttigi Aqordanyń baspasóz qyzmetine silteme jasap.

Kezdesýde Nursultan Nazarbaevqa óńirdiń áleýmettik-ekonomıkalyq damýy jáne Kaspıı mańy memleketteri basshylarynyń samıtine daıyndyq barysy jóninde esep berildi.

Qazaqstan Prezıdenti samıtti ótkizýge tyńǵylyqty daıyndalý qajettigin aıtty.

– Aqtaýda bes eldiń delegasıalary qatysatyn Kaspıı mańy memleketteri basshylarynyń samıtin ótkizý josparlanýda. Osy kezdesýge qatysty barlyq uıymdastyrý máselelerin pysyqtaý kerek, – dedi Nursultan Nazarbaev.

Sonymen qatar Eraly Toǵjanov óndiris, qurylys, aýyl sharýashylyǵy jáne ınvestısıa tartý salalaryndaǵy memlekettik jáne salalyq baǵdarlamalardyń júzege asyrylý barysyn baıandady.

– Negizgi ekonomıkalyq kórsetkishterdiń ósimi baıqalyp otyr. Sizdiń qoıǵan mindetterińizdiń bári iske asyrylýda. 2017 jyldyń qorytyndysy boıynsha óńirdegi óndiristiń kólemi 100,1 paıyzǵa jetti, – dedi Mańǵystaý oblysynyń ákimi.

Kezdesý sońynda Memleket basshysy birqatar naqty tapsyrma berdi.