Óskemende otbasy qundylyqtaryn dáripteýge baǵyttalǵan «Mereıli otbasy-2018» ulttyq baıqaýynyń oblystyq kezeńi máresine jetti.

Otbasy – adam balasynyń altyn dińgegi. Otbasyndaǵy tárbıeniń ornyn esh nárse toltyra almaıdy. «El bolam deseń, besigińdi túze» degen naqyl sóz otbasyndaǵy tárbıeniń mańyzdylyǵyn aıqyndap tur. Oblys ortalyǵynda ótken «Mereıli otbasy –2018» baıqaýynyń aqtyq kezeńine óńirimizdiń qala-aýdandarynan kelgen 19 otbasy qatysty.

Drama teatrdyń baıqaý ótetin zalynda ıne shanshar jer bolmady. Oıýly shapan, kamzol sıaqty ulttyq kıimder kıgen qatysýshylar baıqaýǵa balalarymen, nemere-shóberelerimen kelgen.

– Otbasy qashanda rýhanı jáne mádenı qundylyqtardy, ulttyq salt-dástúrdi saqtaýshy, jalǵastyrýshy, – dedi saltanatty sharany ashqan oblystyq ishki saıasat basqarmasy basshysynyń orynbasary Irına Smıt. – Otbasyn qoldaý, ana men bala densaýlyǵyn qorǵaý — elimizdegi basym baǵyttardyń biri. Elbasymyz Nursultan Nazarbaev únemi aıtatyndaı, Otanǵa degen súıispenshilik otbasynan bastalady. Balaǵa patrıottyq tárbıe berýde januıanyń mańyzy zor. Bes áleýmettik bastama da otbasylar men azamattardyń jaǵdaıyn arttyrý úshin baspana alýdyń jańa múmkindikterin berýge, salyq júktemesin azaıtýǵa baǵyttalǵan. Altyn alqaly, kúmis alqaly 25 myńnan astam batyr ana – elimizdiń maqtanyshy.

Sarapshylardyń sheshimimen semeılik Qanaevtar otbasy baıqaý jeńimpazy atandy. Ekinshi oryndy – aıagózdik Anapánovtar otbasy, úshinshi oryndy – zyrándyq kenshiler Dmıtrıı men Tatána Grıslıt otbasy ıelendi. Barlyq jeńimpazdarǵa tońazytqysh, teledıdar, kir jýǵysh mashınasy sıaqty baǵasy syılyqtar berildi. Al kókpektilik Sydyqovtar «Kóp balaly jas otbasy» atalymyna ıe boldy.