Shyǵys Qazaqstan oblysy voleıboldan Álem chempıonatyn da ótkizýge daıyn. Bul týraly búgin oblys ákiminiń júldesi sarapqa salynatyn kezekti, HHİ halyqtyq sport oıyndarynyń ashylý saltanatynda aımaq basshysy Danıal Ahmetov málimdedi.
– Bizdiń oblystan kóptegen respýblıkalyq jáne halyqaralyq jarystardyń, Álem chempıonattary men Olımpıada oıyndarynyń jeńimpazdary, júldegerleri shyqqan. Olardyń ishinde Olga Rypakova, Aıbek Nuǵymarov, Denıs Ýlanov pen Alekseı Poltoranın sıaqty sańlaqtar bar. Oblysta buqaralyq sporttyń damýyna aıryqsha kóńil bólinip keledi. Óńir turǵyndaryna úsh myńnan astam sporttyq nysan men seksıalar qyzmet kórsetýde. Shyǵysqazaqstandyqtardyń sporttyń 94 túrimen, onyń qyrqy — Olımpıadalyq sport, aınalysýǵa múmkindikteri bar. Osyndaı aýqymdy jumystyń arqasynda sońǵy jyldary salaýatty ómir saltyn ustanatyn jerlesterimizdiń qatary kóbeıe tústi. Bıyldyń ózinde ǵana sportshylarymyz respýblıkalyq jáne halyqaralyq jarystardan 682 medal alyp qaıtty. Sańlaqtarymyz aldaǵy baıraqty básekelerde de namysty qoldan bermeıdi dep senemiz. Al óz tarapymyzdan óńir sportyna budan bylaı da jan-jaqty qoldaý kórsete beretin bolamyz, – degen oblys ákimi osymen 21-shi ret ótkizilip otyrǵan halyqtyq oıyndarǵa qatysýshylardy jarystyń bastalýymen quttyqtap, olarǵa sáttilik pen jeńis tiledi.
Aımaq basshysy óz sózinde az ýaqyttyń ishinde oblys maqtanyshyna aınalyp úlgergen «Altay athletics» kásibı jeńil atletıka klýby men «Altaı» voleıbol klýbynyń jetistikterin atap ótti. Bıyl osymen ekinshi ret voleıboldan qyzdar komandalary arasyndaǵy klýbtyq Azıa chempıonatyn qabyldaǵaly otyrǵan Shyǵys Qazaqstan oblysynyń bolashaqta Álem birinshiligin de ótkizýge qaýqary jetetinin málimdedi.
Saltanatty jıyn barysynda oblys ákimi Phenchhanda ótken qysqy Olımpıada oıyndarynyń qola júldegeri, frıstaılshy Iýlıa Galyshevaǵa da erekshe qurmet kórsetti. Tórt jyldyqtyń basty dodasynda el qorjynyna jalǵyz júlde salǵan Iýlıa óńir basshysy men demeýshiler atynan bir bólmeli páter, 16 mıllıon teńgeniń sertıfıkaty jáne «Pejo» markaly sýjańa avtokóliktiń kiltine ıe boldy. Sonymen qatar marapattan Galyshevanyń bapkeri Elena Krýglyhına men Ońtústik Koreıadaǵy Olımpıada oıyndaryna qatysqan taǵy bir frıstaılshy Pavel Kolmakov ta qur qalǵan joq. Olardyń ekeýine de qyzmettik páterdiń kiltteri tabys etildi.
Dál osydan keıin Óskemendegi Olga Rypakova atyndaǵy jeńil atletıka manejine jınalǵan sport súıer qaýymnyń nazaryna tamasha konserttik baǵdarlama usynyldy. Sondaı-aq jankúıerler halyqtyq oıyndarǵa qatysýshy komandalardyń saltanatty sherýin tamashalap, t-rt kún boıy jarysatyn sportshylarǵa qoshemet kórsetti.
Aıta keteıik, bıylǵy spartakıada baǵdarlamasyna 20 sport túri engizilipti. Oblysymyzdyń túkpir-túkpirinen jınalǵan jasy 18-den asqan sportshylar 170 medal jıyntyǵyn sarapqa salmaq.
