Óskemende mektep oqýshylarynyń arasynda halyqaralyq «Iassaýıtaný» bilim baıqaýynyń oblystyq kezeńi ótti. Uly oıshyldyń  30-35 hıkmetin naqyshyna keltire jatqa aıtqan qatysýshylar birinen-biri asatyn ónerlerin ortaǵa saldy.

«Rýhanı jańǵyrý» baǵdarlamasyn iske asyrý aıasynda oblystyq bilim basqarmasynyń qosymsha bilim berý jáne deneshynyqtyrý ortalyǵy uıymdastyrǵan is-sharada óńirimizdiń ár aýdanynan iriktelgen 6-11-synyptar aralyǵyndaǵy 13 oqýshy baq synady.

-Elbasymyzdyń «Rýhanı jańǵyrý» baǵdarlamalyq maqalasynda týǵan jerge taǵzym etý, ádet-ǵurpymyzdy bilý degen úlken másele qozǵaldy. Árbir urpaq eliniń patrıoty bolý úshin týǵan jeriniń bedeldi tulǵalarymen qatar, ár tasynyń tarıhyn bilgeni jón. Mańyzdysy – jastarymyz Iassaýı hıkmetterin jattap qana qoımaı, oılaryna túıip, odan tárbıe alyp, dos-jarandaryna nasıhattaı júrse eken,-deıdi «Órleý» biliktilikti arttyrý ulttyq ortalyǵynyń fılıaly, oblystyq pedagogıkalyq qyzmetkerlerdiń biliktiligin arttyrý ınstıtýtynyń aǵa oqytýshysy Baqytbek Nuǵymanov.

Baıqaýdyń alǵashqy kezeńinde sarapshylar barlyǵy 149 hıkmettiń  30-34-in jattap kelgen qatysýshylardyń ónerin tamashalap, baıqaý erejesine sáıkes úsh ret múdirgen bala saıystan shyǵyp otyrdy. Ásirese, zaısandyq Dılnaz Qaıyrbek pen abaılyq Ádilet Aıtmuhanbettiń ónerine tánti boldyq. «Peıish pen tozaqtyń talasy», «Opasyz fánı», «Párýardıgar», «Hý» alqasy» hıkmetterin birinen soń biri úzbeı ilip áketip, jatqa aıtyp otyrdy. Bul jerde daryndy jetkinshekterdi jastaıynan qasıetti sóz ónerine baýlyp júrgen A.Balǵyn, J.Qonaqaeva, J.Sadýaqasova syndy jetekshilerdiń eńbekterin aıryqsha atap ótken jón.

Al bilim saıysynyń ekinshi sheshýshi kezeńinde qatysýshylar Qoja Ahmet Iassaýıdiń ómiri men qyzmeti, ilimi men murasy, hıkmetteriniń mán-maǵynasy, ǵulamanyń shákirtteri men izbasarlary jaıly saýaldarǵa jaýap berýi tıis boldy.

Baıqaý qorytyndysy boıynsha Abaı aýdanyndaǵy Áýezov orta mektebiniń 10-synyp oqýshysy Ádilet Aıtmuhanbet pen Aıagóz aýdanyndaǵy D.Babataıuly orta mektebiniń 8-synyp oqýshysy Amanbol Tursynǵalıev júldeli ekinshi oryn alsa, Katonqaraǵaı aýdany Rykov atyndaǵy orta mekteptiń 10-synyp oqýshysy Merýert Qadylhanova, osy mekteptiń  8-synyp oqýshysy Aıym Ádilhan, Ulan aýdany Bozanbaı orta mektebiniń 10-synyp oqýshysy Kúnshýaq Estaı úshinshi orynǵa ıe boldy.

Al Zaısan aýdany Abaı orta mektebiniń 8-synyp oqýshysy Dılnaz Qaıyrbek sarapshylardyń sheshimimen halyqaralyq «Iassaýıtaný» bilim baıqaýynyń oblystyq kezeńiniń jeńimpazy atandy. Aldaǵy qyrkúıek aıynda respýblıkalyq kezeńde oblys namysyn qorǵaıtyn Dılnazǵa sáttilik serik bolsyn deımiz.