Qalbataý aýlynda Olımpıada oıyndarynyń kúmis jáne qola júldegeri, álem chempıony, QSRO men QR-nyń eńbek sińirgen sport sheberi Dáýlet Turlyhanovtyń júldesine arnalǵan, grek-rım kúresinen jasóspirimder arasynda ashyq oblystyq týrnırdiń jalaýy jelbiredi. Saıysqa Óskemen, Semeı qalalary, Jarma, Aıagóz jáne Úrjar aýdandarynan bólek, Almaty oblysy, Shymkent, Pavlodar ári Almaty shaharynan 200-den asa jas sportshy jınaldy.
-Bul týrnırdiń basty maqsaty – jasóspirimderdi sportqa baýlý, ekinshiden grek-rım kúresin nasıhattaý ári damytý. Uıymdastyrý komıtetine alǵysymdy aıtamyn. Bul jastaǵy palýandarǵa mundaı jarystar kóbirek qajet. Sebebi osy jerde ár aımaqtan kelgen balalar, ıyq tiresip, tájirıbe jınaqtaıdy. Saıys óte tartysty. Shynymdy aıtsam, ózim qyzyǵyp otyrmyn. Óıtkeni eresekterge qaraǵanda, balalar túrli ádis-aılalardy jasaýǵa taısalmaıdy. Búgingi jarys sonysymen tartymdy, — degen oıymen bólisti Azıa kúres qaýymdastyǵynyń prezıdenti, dańqty jerlesimiz Dáýlet Turlyhanov.
Boz kilemdegi beldesýlerge keler bolsaq, jas órender 10 salmaqta ózara myqtyny anyqtady. Osy 10 salmaqtyń 8-de shyǵysqazaqstandyq jasóspirimderge teń keler qarsylas tabylǵan joq. Sonyń arasynan 5 salmaq dárejesinde jarmalyq balǵyndar altynnan alqa taǵyndy. Naqtyraq aıtqanda, 26 kelide Nurjan Áshimjanov, 36 kelide Ernur Eltaı, 39 kelide Erdos Jumaǵulov, 46 kelide Dıas Qajymurat jáne 58-den joǵary salmaqta Vladıslav Dıkterev jeńis tuǵyryna kóterildi. Osydan-aq jarmalyqtardyń klasıkalyq kúresti qandaı deńgeıde meńgergendigin ańǵarýǵa bolady. Sonymen qatar, aıagózdik Dıas Seıitqalı jáne Aıbek Aıtkarımovpen qatar semeılik Erqanat Muqıat jeńimpaz atandy. Barlyq jeńimpazdar jáne júldegerlerge, sondaı-aq jattyqtyrýshylarǵa aqshalaı syıaqy tabys etildi.
* Jarystarǵa qatysqandy unatamyn. Búgingi beldesýler ózime asa qıyn bolmady. Dese de jartylaı synda óz jerlesimmen kezdestim. Sol kezdesý kúrdelirek boldy. Óskende Dáýlet Turlyhanov jáne Aıbek Nuǵymarov sekildi álem chempıony bolǵym keledi, — deıdi týrnır jeńimpazdarynyń biri, jarmalyq Nurjan Áshimjanov.
