Ótken jyly «QAZAQSTAN» Ulttyq telearnasynda ótken «MEN QAZAQPYN» halyqaralyq megajobasy ekishi márte jumysyn bastaǵaly jatyr. «Rýhanı jańǵyrý» baǵdarlamasy aıasynda qolǵa alynǵan bul jobanyń irikteý jumystary jaıly oblystyq «ALTAI» telearnasynyń dırektory Aıda Jabaǵıeva men dırektordyń orynbasary, bas redaktor Aıdos Juqanuly baspasóz máslıhatyn ótkizdi.
– Biz irikteýimizdi mamyr aıynyń 28 kúni Úrjar aýdanynan bastaǵaly otyrmyz. Bıylǵy baıqaýdyń basty ereksheligi ár aýdannan iriktelgen ónerpazdardy oblys ortalyǵyna ákelip jeńimpazdardy anyqtaımyz. Ár janrdyń jeńimpazy respýblıkalyq kezeńge joldama alady, – dedi telearna dırektory Aıda Jabaǵıeva.
Saıys dástúrli án, terme aıtý, kúı shertý syndy úsh atalym boıynsha ótedi. Al qazylar alqasyna oblystyq ishki saıasat basqarmasynan, mádenıet basqarmasynan, «ALTAI» telearnasynyń ókili jáne jergilikti jerden belgili bir óner ıesi taǵaıyndalady dep kútilýde.
– Telearna dırektory, ıá bolmasa ózim qazylardyń qatarynda mindetti túrde bolamyz. Múmkindigimizshe tamyr-tanystyqqa, jershildik pen rýshyldyqqa jol bermeý úshin osylaı sheshtik, — deıdi dırektordyń orynbasary Aıdos Juqanuly.
Saıysqa qatysqysy keletinderden eshqandaı mýzykalyq bilimin anyqtaıtyn qujattardy talap etpeıdi. Sondaı-aq, ulttyq kıimi men ár óńirdiń dástúrli án mektebiniń bolmasa kúı qaǵysynyń mektebin saqtaǵan ónerpazdardyń eńbegi baǵalanatyn kórinedi.
Oqyrmandarymyzǵa paıdasy tısin degen nıetpen ár aýdanda irikteý ótetin kúnderdi kórsete keteıik.
28 mamyr Úrjar, 29 mamyr Aıagóz, 4 maýsym Zaısan, 5 maýsym Tarbaǵataı, 6 maýsym Kókpekti, 11 maýsym Ulan, 18 maýsym Katonqaraǵaı, 19 maýsym Kúrshim aýdandarynda ótedi. Al 30 maýsym kúni Óskemen qalasynda oblystyq baıqaý ótip, respýblıkaǵa baratyn jeńimpazdar anyqtalady.
Ár aýdannan sýyrylyp shyqqan ónerpazdardyń oblystyq baıqaýyn «ALTAI» telearnasy arnaıy túsirip, jeńimpazdardyń juldyzynyń jarqyraýyna múmkindik beredi. Ótken jyly bul baıqaýǵa Monǵolıa, Reseı, Qytaı syndy kórshi elderdegi qarakózder de kelip qatysyp, baǵyn synaǵan edi. Bıyl bul máseleni ulttyq arnadaǵy uıymdastyrýshylar aqyldasyp jatqanyn aıtty baspasóz májilisin ótkizýshiler.
