Keshe keshkisin Nevzorovtar otbasy atyndaǵy beıneleý óneri murajaıynda «Meniń súıikti qalam» degen ataýmen «Mýzeı Túni-2018» ótti. Kelem deýshi árbir qala turǵynyna murajaı esigi ashyq boldy. Mýzeıdiń ár qabyrǵasynda ilinip turǵan myńjyldyq tarıhy bar kartınalar kózdiń jaýyn alyp, dál osy kúni ózgeshe keıipke enip, jańasha bir leppen jandana túskendeı kórindi.

Uıymdastyrýshylar shahar jurtshylyǵyna erekshe qylyp daıyndaǵan baǵdarlamalaryn usynyp, İzilik pen mádenıettiń kórinisi bolyp tabylatyn aıyryqsha týyndylardy túngi 11-ge deıin tamashalaýǵa ruqsat etti. Kesh barysynda tórt mýzeıdiń qorynan «Áli de sol Ertiste!» kórkem keskindeme jáne grafıka kórmesi, Olga Fedenevanyń erekshe qýyrshaqtary kópshiliktiń nazaryna usynyldy. Sondaı-aq, «Meniń súıikti qalam» otkrytka jasaý men Valerıı Tımofeevtyń «Monotıpıa tehnıkasyndaǵy qalalyq peızaj» atty sheberlik klasy ótkizildi.

Shákárim atyndaǵy memlekettik ýnıversıtetiniń 2 kýrs stýdenti  Úmit Itjanova:

-18 mamyr- Dúnıejúzilik murajaılar kúni. Bul mereke tek murajaı qyzmetkerleriniń emes, jalpy mádenı murany saqtaýǵa beıjaı qaramaıtyn jandardyń meıramy. Shyny kerek osy shara ótedi degen habarlandyrýdy estigende mindetti túrde baryp, kóremin dep dostaryma ýáde etken bolatynmyn. Búgin mine keldim bári oıdaǵydaı bolyp jatyr, maǵan óte qatty unady. Mundaǵy árbir kartına tiri qubylystar ispetti. Al erekshelikke toly ózgeshe kózildirikter, bas kıimder tipti kóńilimdi jadyratyp jiberdi. Jalpy alǵanda, jaqsy kóremin osylaı demalǵandy. Unaıdy jáne basqalarǵa da keńes beremin.

Eski ańyzdarǵa sensek, murajaıda túngi ýaqytta ǵajaıyp qubylystar bolady deıdi. Ol rasymen de boldy dep aıtsaq ta artyq aıtpaǵanymyz. Olaı deıtin sebebimiz Vsevolod Demıdovtyń «Jańa kózqaras» atty optıkalyq aspaptar kórmesi talaı adamdardy tańqaldyrdy. Bul jerde kez-kelgen adam Vsevolod myrzanyń ózi jasaǵan túrli asyl tastarmen bezendirilgen eksklúzıvti qalpaqtardy, ártúrli pishindegi kózildirikterdi kózben kórip qana qoımaı, kıip kórý múmkindigine de ıe boldy.