Oblys ortalyǵynda JITS dertinen qaıtys bolǵandardy eske alý aksıasyna osy qaýipti dertten kóz jumǵan týystary men dostaryn eske alýshylar men qala turǵyndary jınaldy. Shara aıasynda qaıyrymdylyq marafony ótti. Jarysqa bes jastaǵy balaqaıdan bastap, 58 jasqa deıingi azamat qatysty.

-Óńirde AITV juqpasyn juqtyrǵan 30 bala esepte tur. Qaıyrymdylyq jarysynan túsken 14 myńnan astam qarjy osy balǵyndarǵa dárýmender alýǵa jumsalady. Qaterli juqpamen kúres barysynda bizge «Qýat», «Ansver» sıaqty belsendi úkimettik emes uıymdar únemi qoldaý kórsetip keledi, — dep atap ótti oblystyq JITS aldyn alý jáne kúres ortalyǵynyǵ bas dárigeri Marına Jegolko.

Aksıa kezinde JITS dertinen qaıtys bolǵandardyń esimderi jazylǵan kvılt ilindi.

-Jyl saıyn bul kúndi álemde 70-ten astam elde atap ótedi. Bul tek qaterli juqpa aramyzdan alyp ketkenderi eske alý ǵana emes, qoǵamnyń nazaryn osy dertke shaldyqqandardyń problemalaryna aýdarý. Qoǵamda áli kúnge AITV juqpasyn juqtyrǵandardy kemsitý, quqyqtaryn shekteý kezdesedi. Bizdiń qoǵamdyq birlestik osyndaı dıagnozy bar adamdarǵa qoldaý kórsetedi. Bizdiń uıymda 2017 jyldan beri silekeı arqyly juqpany anyqtaýǵa jedel test ótkiziledi. Testiń nátıjesiniń dáldigi 99 paıyz desek te, dıagnoz odan keıin mindetti túrde zerthanalyq taldaýlar júrgizilip baryp, qoıylady, — deıdi «Qýat» úkitettik emes uıymynyń jetekshisi Andreı Chernyshov.

Shara kezinde nıet bildirýshiler ekspress-testiń kómegimen óz statýstaryn anyqtaý múmkindigine ıe boldy. Sonymen qatar jınalǵandar qaterli juqpa týraly vıktorınalyq suraqtarǵa jaýap berdi. Jeńimpazdardyń barlyǵyna estelik syılyqtar tapsyryldy.

Aksıanyń sońynda qatysýshylar osy dertten kóz jumǵandardy eske alý maqsatynda maısham jaǵyp, aspanǵa sharlar ushyrdy.