Astanada iri kólemde para alý ústinde 32 shendiniń tutqyndalǵany belgili boldy, dep jazady Qamshy.kz aqparat agenttigi.
Bul týraly Astanadaǵy jemqorlyqqa qarsy kúres ulttyq búro departamentiniń basshysy Shyńǵys Qabdýlla málimdedi. Onyń aıtýynsha qazirgi tańda 5 memlekettik deńgeıdegi jáne 15 memlekettik organ basshylary tutqyndalǵan. Ázirge isti bolǵan shendilerdiń esimderi qupıa qalyp otyr.
- Shendiler asa iri kólemdegi para alý kezinde ustaldy. Zamanaýı quraldardyń kómegimen sybaılas jemqorlyq qylmystaryn anyqtaýda oń áser men dınamıkaǵa qol jetkizip otyrmyz. Bes aıda 4 mıllıard teńge memleketke qaıtaryldy. Bul tek qalalyq departamenttiń kórsetken nátıjesi, - dedi departament basshysy.
Belgili saıasattanýshy Talǵat Qalıev atalmysh oqıǵa boıynsha óziniń Telegram paraqshasynda pikir bildirdi.
"32 shendiniń tutqyndalýy neni bildiredi? Qupıany uzaq saqtaýdy ádet qylmaǵan sol jaq jaǵalaýdyń turǵyndary týraly aıtylǵanda ár kúdiktiniń jasaǵan qylmysyn áshkereleıtin aıǵaqtardy jınaý ońaı sharýa emes. İsti bolǵandardyń esimi áli jumbaq kúıde qalyp otyr. Iaǵnı, ulttyq búro ótip jatqan jedel tergeý sharalarynda tolyq qupıa rejımdi saqtap otyr degen sóz.
Bul tásildi sybaılas jemqorlyqqa qarsy kúres agenttiginiń jańa basshysy Alık Shpekbaev pen ulttyq búro tóraǵasy Qaırat Sýntaevtyń erekshe qoltańbasy dep baǵalaýǵa bolady. Bul tásil sol jaǵalaýdaǵylardy eseńgiretip tastady.
Prezıdenttiń agenttik basshysymen jýyrda ótkizgen kezdesýinde osy tergeý jumystary týraly tapsyrma berilgenin joqqa shyǵara almaımyz. Qazirgi jaǵdaıda bul tapsyrma yqpaldy qorǵaýshysy, myqty týystary bar shendilerge qarsy baǵyttalǵan saıası áreketke aınalyp otyrǵany sózsiz.
Tutqyndalǵan shendiler men olardyń qorǵaýshylary kimder? Bul týraly keshirek bilemiz. Qazir agenttiktiń el qyzyǵýshylyǵyn týdyryp jatqan áreketine kedergi keltirýge bolmaıdy. Maǵan olardyń bul stıli unaıdy", - dep jazdy saıasattanýshy.
Esterińizge salsaq, osyǵan deıin memlekettik qyzmet isteri jáne sybaılas jemqorlyqqa qarsy kúres agenttiginiń basshysy Alık Shpekbaev Facebook-ta jemqorlyq áreketteri týraly habarlaǵan qazaqstandyqtarǵa 730 dollar kóleminde syıaqy berýdi ýáde etken bolatyn. Sonymen qatar, jelide kvazımemlekettik sektordyń iri kóshbasshylary tutqyndalǵany sóz bolǵan edi.
