14 maýsymda túnde Almatydaǵy Saıahat avtobeketi órtke orandy, dep habarlaıdy Qamshy.kz aqparat agenttigi.

Kýágerlerdiń aıtýy boıynsha, órt aldynda jarylys daýsy estilgen. Keıinirek jarylystyń azyq-túlik satatyn dúńgirshekterdiń janynda bolǵany anyqtaldy.

Tótenshe jaǵdaı ornynda órt sóndirý jumystary áli de júrip jatyr.

Tilsiz jaýdyń betin qaıtarýǵa 42 órt sóndirýshi, 12 birlik arnaıy órt sóndirý tehnıkasy jumyldyryldy.

TJM usynǵan aqparatqa sáıkes, túngi 22.26-da 140 sharshy metr aýmaqta bes býtık órtendi. Sonymen qatar Saıahat avtobeketiniń 10 sharshy metr shatyry ot qursaýynda ketti. Órttiń jalpy aýdany 150 sharshy metrdi quraıdy. Órt saldarynan qurban bolǵandar men zardap shekkender tirkelgen joq.

Órt sóndirýshiler jalynnyń ishinen úsh 50 lıtrlik jáne úsh 25 lıtrlik gaz balondaryn alyp shyqqan.

Áleýmettik jelilerde otqa oranǵan avtovokzaldyń vıdeosy jedel tarap ketti.