Qazaqstan táýelsizdik alǵan 27 jyl ishinde úkimet basshysy 10 ret aýysty. Osy aýys-túıis arasynda eń kóp bılikte otyrǵan adam – Kárim Másimov. Ol – úkimet basshysy bolyp eki ret taǵaıyndalǵan jalǵyz saıasatker. Qazir QR Ulttyq qaýipsizdik komıtetiniń tóraǵasy.
Táýelsiz Qazaqstannyń jetinshi premer-mınıstri bolyp Kárim Másimov 2007 jyly Elbasynyń jarlyǵymen 10 qańtarda taǵaıyndalǵan. Úkimette 5 jyl basshylyq etkennen keıin ornyna Serik Ahmetov keldi. Eki jyl Úkimettiń tizginin ustaǵan Ahmetovti qaıtadan Kárim Másimov almastyrdy.
MÁSİMOV KİM?
Kárim Másimov – Beıjindegi tilder ınstıtýtyn, Ýhan zań ýnıversıtetin, Qazaq memlekettik ekonomıka ýnıversıtetin bitirgen. Ekonomıka ǵylymdarynyń doktory. Búgin 53 jasqa tolyp otyr.
Másimov eńbek jolyn 1991 jyly Qazaqstan Eńbek mınıstrliginde bas ekonomıs bolyp bastaǵan. 2000 jyly Kólik jáne komýnıkasıa mınıstri bolady.
2001 jyldyń qarashasynan QR Premer-mınıstriniń orynbasary,
2002 jyldyń shildesinen QR Prezıdentiniń kómekshisi,
2006 – 2007 jyldary QR Premer-mınıstriniń orynbasary,
2007 – 2012 jj, 2014-2016 jj. Qazaqstan Respýblıkasynyń premer-mınıstri qyzmetterin atqardy.
Aǵylshyn, qytaı, arab tilderin meńgergen.
EŃ UZAQ OTYRǴAN ÚKİMET BASSHYSY
1991 jyly jeltoqsanda táýelsizdigin jarıalaǵan Qazaqstannyń alǵashqy premer-mınıstri Sergeı Tereshenko boldy. Úsh jyldan keıin bul qyzmetke Ákejan Qajegeldın keldi. Taǵy úsh jyldan keıin Nurlan Balǵymbaev Úkimet basqardy. Eki jyl qyzmetinen keıin ornyna Qasym-Jomart Toqaev otyrdy. Odan keıin qysqa merzimde úkimet basshysy qyzmetin Imanǵalı Tasmaǵambetov atqardy. 2003-07 jyldary Úkimet basyna Danıal Ahmetov keldi. 2007 jyly premer-mınıstrlikke Másimov taǵaıyndaldy.
2012-2014 jyldary premer-mınıstr qyzmetin Serik Ahmetov atqarsa, 2014-2016 jyldary Úkimet basyna Kárim Másimov oraldy.
Árıne, úkimet basshysyn Elbasy Nursultan Nazarbaev taǵaıyndaıdy. Al prezıdent kómekshisi bolyp qyzmet atqarǵanyn, odan keıin premer-mınıstrge orynbasar bolǵanyn, artynsha Úkimet bıligin eki ret qolǵa alǵanyn eskersek, saıasattanýshy Dosym Sátpaevyń bir suhbatyndaǵy: «Qandaı da bir myqty qoldaýsyz premer-mınıstr qyzmetinde uzaq otyrý múmkin emes. Kárim Másimovtiń prezıdent qaramaǵyndaǵy adamdarmen belgili baılanysy bar ekenin de joqqa shyǵarýǵa bolmaıdy», - degen pikiri oryndy ma dep qalasyń.
MÁSİMOVTİŃ BÚGİNGİ QUZYRETİ
Premer-mınıstr bolyp Baqytjan Saǵyntaev 2016 jyly taǵaıyndaldy. Al eki ret úkimet basshysy bolǵan ári eń uzaq merzimde mınıstrler kabınetin «ustap turǵan» Másimov 2016 jyly Qazaqstan Respýblıkasy Ulttyq qaýipsizdik komıtetiniń tóraǵasy bolyp taǵaıyndaldy.
Qazaqstan Respýblıkasynyń Ulttyq qaýipsizdik komıteti — Prezıdentke tikeleı baǵynatyn jáne esep beretin arnaýly memlekettik organ.
Iaǵnı Qazaqstannyń barlyq áskeriniń is-qımyly men ulttyq qaýipsizdik organdarynyń qyzmetine, el shekarasynyń qorǵalýyna, memlekettik qupıalardy saqtaý salasynda biryńǵaı saıasattyń iske asýyna prezıdentten keıin jaýap beretin birden-bir adam Kárim Másimov bolyp otyr. Úkimettiń basynda otyrmasa da, eldiń tynyshtyǵyn oılap Qaýipsizdik komıtetiniń jaıly kreslosynda otyr. Tipti, jýrnalısermen, halyqpen baılanysýǵa da ýaqyty joq.
MÁSİMOV NESİMEN ESTE QALDY?
Kárim Másimov alǵash ret Úkimet otyrysyn bastan-aıaq qazaqsha júrgizgen úkimetbasy retinde este qaldy. 2009 jyly sáýirdiń 14-i kúni ol kezekti Úkimet otyrysynda aldaǵy barlyq jıyn memlekettik tilde ótetinin eskertken edi. Biraq is júzinde olaı bolǵan joq.
Sonymen qatar Másimov bastapqyda barlyq áleýmettik jelige tirkelip, halyqtyń talap-aryzyna qulaq túretindeı kórindi. Aqyryn-aqyryn ol da qaldy. Másimov premer-mınıstr bolyp turǵan kezde halyqpen tikeleı baılanysqa shyqqan emes. Tipti, premer-mınıstrdiń saıtynda «suraq-jaýap» aıdary da bolmaǵan.
Úkimet basynda otyrǵan kezde de bir jyl ishinde Qazaqstannyń bir oblysyna ǵana iskerlik sapar jasaǵan. Onyń ózi Atyraýdyń zıaly qaýymyna jańa ákimdi tanystyrý úshin. Premer-mınıstr kezinde halyqtyń jaǵdaıyn Astanadaǵy kabınetinde, mınıstrler men ákimderdiń esep-qısabynan bilip otyrǵan.
Qazaqstan musylmandary odaǵy men Ortalyq Azıadaǵy adam quqyqtary jónindegi musylman komıteti 2013 jyldyń eń bedeldi memlekettik qaıratkeri dep Kárim Másimovti atady. Bul da Úkimet basynda otyrǵan kezdegi jetistigi edi. Odan beri Másimovtyń sózi bar da, ózi joq.
