2018 jylǵy 1 mamyrǵa elimizdegi halyq sany 18 232,0 myń adamdy qurady, sonyń ishinde qalalyqtar – 10 492,2 myń (57,5%), aýyldyqtar – 7 739,8 myń adamdy (42,5%) qurady. 2017 jylǵy 1 mamyrmen salystyrǵanda halyq sany 238,5 myń adamǵa nemese 1,3% ósti, dep habarlaıdy Qamshy.kz aqparat agenttigi QR Ulttyq ekonomıka mınıstrliginiń baspasóz qyzmetine silteme jasap. 

Halyqtyń tabıǵı qozǵalysy

AHAT organdary usynǵan azamattyq hal aktileri jazbalaryndaǵy málimetterdi óńdeý nátıjesinde, 2018 jylǵy qańtar-sáýirde týylǵandar sany 124,3 myń adamdy qurady, bul 2017 jylǵy qańtar-sáýirge qaraǵanda 2,4% kóp. Týýdyń jalpy koefısıenti 1000 adamǵa 20,70 týylǵandardy qurady.

2018 jylǵy qańtar-sáýirde respýblıka halqynyń tabıǵı ósimi 2017 jylǵy qańtar-sáýirmen salystyrǵanda 2,3 myń adamǵa nemese 3,1% kóbeıip, 79,5 myń adamdy qurady. Tabıǵı ósimniń jalpy koefısıenti 1000 adamǵa shaqqanda 13,24 adamdy qurady.

Qarastyrylyp otyrǵan kezeńde qaıtys bolǵandar sany 44,8 myń adamdy qurady, bul 2017 jylǵy qańtar-sáýirge qaraǵanda 1,1% kóp. Ólim-jitimniń jalpy koefısıenti 1000 adamǵa 7,46 qaıtys bolǵandardy qurady.

2018 jylǵy qańtar-sáýirde respýblıkada 1 jasqa deıingi 1095 náreste ólimi tirkeldi. 2017 jylǵy qańtar-sáýirmen salystyrǵanda 1 jasqa deıingi shetinegen náreste sany 3,9% kóbeıdi.

Náreste ólim-jitiminiń negizgi sebebi - perınataldyq kezeńde paıda bolatyn jaǵdaılar, budan 2018 jylǵy qańtar-sáýirde 506 náreste qaıtys bolyp, náresteler arasyndaǵy jalpy ólim sanynyń 46,2% qurady. Týa bitken aýytqýlardan 239 nemese 21,8%, tynys organdary aýrýlarynan – 89 nemese 8,1%, ınfeksıalyq pen parazıtarly aýrýlardan – 55 náreste nemese 5% jáne jazataıym jaǵdaıdan, ýlanýdan jáne jaraqattan – 50 nemese 4,6% náreste qaıtys boldy. 

2018 jylǵy qańtar-naýryzda náreste ólim-jitiminiń koeffısıeti 1000 týǵandarǵa shaqqanda 8,81 qurady.

Kóshi-qon qyzmeti organdary usynǵan málimetterdi óńdeý nátıjesinde, 2018 jylǵy qańtar-sáýirde elimizge turǵylyqty turýǵa kelgenderdiń tirkelý sany 2017 jylǵy qańtar-sáýirmen salystyrǵanda 24,9% kemip, 4 421 adam qurady. Elimizden ketken kóship-qonýshylardyń tirkelý sany 20,8% kóbeıip, 9 332 adam qurady, kóshi-qonnyń aıyrymy - 4 911 adam boldy.

Elimizdegi negizgi kóshi-qon almasýy TMD memleketterimen bolýda.

• TMD elderinen kelgenderdiń úlesi 77,3%;
• TMD elderge ketkenderdiń úlesi 88,8% qurady.

Óńiraralyq kóship-qonýshylardyń úlesine elimizdiń jalpy ishki kóship-qonýshylar sanynyń 31,7% kurady. Óńiraralyq kóshi-qonnyń oń aıyrymy:

• Almaty qalasy – 11 905 adam;
• Astana qalasy – 3 514 adam;
• Ońtústik Qazaqstan oblysy – 708 adam;
• Aqmola oblysy – 26 adam;
• Mańǵystaý oblysy – 20 adam qalyptasty