Sıfrlyq tehnologıalar jumysymyzdy jeńildetedi. Biz bul tehnologıalardy qyzmetimizde qoldanamyz, deıdi Astana qalasy İİD-niń kóshi-qon qyzmeti basqarmasynyń bastyǵy Arman Baımuhamet.
Onyń aıtýynsha, eńbek mıgranttary ınternet arqyly ortalyqtyń saıtyna kirip, ýaqytsha turý múmkindigin uzarta alady.
«Eńbek mıgrangtary ınternet arqyly portalymyzǵa kirip, ýaqytsha turý múmkindigin uzarta alady. Al, aldaǵy ýaqytta taǵy da sıfrlyq tehnologıalardyń qoldaný aıasyn keńitetin bolamyz», – dedi A. Baımuhamet.
Sondaı-aq, elordada kóshi-qon qyzmetin jeńildetý úshin ashylǵan mıgrasıalyq HQKO óz tıimdilikterin kórsetýde. Qujat alýǵa ketetin ýaqyt azaıyp, qyzmet kórsetý aıasy ońtaılandyryldy.
«Buryn qujattaryn alý úshin shet el azamattary 4 kúnnen 6 kúnge deıin ýaqyt jumsaıtyn. Qazir 1 kúnniń ishinde qujattaryn rásimdeı alady. Negizinde jospar boıynsha 1 saǵat dep eseptegen edik. Bul endi pılottyq joba bolǵandyqtan, birtindep atalǵan kórsetkishke jetetin bolamyz», – dedi basqarma bastyǵy.
Aıta keteıik, elimizdegi eń alǵashqy mıgrasıalyq halyqqa qyzmet kórsetý ortalyǵy 2018 jyldyń 12 qańtarynda pılottyq joba retinde Astana qalasynda ashylǵan bolatyn. Ol ortalyq A. Imanov 31 kóshesinde ornalasqan. Atalǵan ortalyq saǵat tańǵy 9.00-den keshki 18.30-ǵa deıin úzilissiz jumys isteıdi. Mıgrasıalyq HQKO-nyń ashylýyndaǵy negizgi maqsat - kóshi-qon qyzmetin ońtaılandyrý bolyp tabylady. Ol óz kezeginde kóshi-qon salasyndaǵy kedergilerdi joıýǵa baǵyttalyp, sheteldik azamattarǵa memlekettik qyzmet túrlerin kórsetýde. Búginde ortalyqta bank, saýsaq tańbasyn alýshylar, medısınalyq pýnkt, emhanalyq saqtandyrý orny men notarıýs bar. Osylardyń barlyǵynyń bir ortalyqta shoǵyrlanýy ýaqytty únemdeýge óz septigin tıgizip jatyr.
Hýdasova Perızat Kómekbaıqyzy
