Astana qalasyndaǵy mıgrasıalyq halyqqa qyzmet kórsetý ortalyǵynda sybaılas jemqorlyqqa qarsy kúres jumystary júrgizilýde. Bul týraly Astana qalasy İİD-niń kóshi-qon qyzmeti basqarmasynyń bastyǵy Arman Baımuhamet málimdedi.

«Sybaılas jemqorlyqty joıý úshin beıne-baqylaý qurylǵylaryn ornattyq. Sondaı-aq, qazirgi tańda tikeleı baılanys joq. Al, buryn bolǵan edi. Sáıkesinshe, osy proses sybaılas jemqorlyqty azaıtady», - dedi A. Baımuhamet.

Degenmen, ol áli de alaıaqtyq áreketterin júzege asyrǵysy keletinder baryn jasyrmady.

«Áli de alaıaqtyq áreketterin júzege asyrǵysy keletinder bar, biraq biz olardy der kezinde anyqtap, qajetti sharalardy qoldanyp otyramyz. Olar kezek kútpeı-aq, ózderine tezirek qyzmet kórsetilgenin qalaıdy. Bizde bári ashyq. Elektrondy kezek kútý júıesi ornalasqan. Sondyqtan, olardy sonda baǵyttaımyz», – dedi basqarma bastyǵy.

Arman Baımuhamettiń aıtýynsha, bul ortalyq halyqqa qyzmet etip, sybaılas jemqorlyqty azaıtý úshin quryldy. Ol eńbek mıgranttaryna qyzmet etýde.

Aıta keteıik, 2018 jyldyń qańtarynda Astanada mıgrasıalyq jáne sıfrlyq halyqqa qyzmet kórsetý ortalyǵy ashylyp, búginde óz qyzmetin halyqqa usynýda. Atalǵan ortalyq kóshi-qon qyzmetin ońtaılandyrý maqsatynda ashylǵan elimizdegi eń alǵashqy pılottyq joba. Ol óz kezeginde kóshi-qon salasyndaǵy kedergilerdi joıýǵa baǵyttalyp, sheteldik azamattarǵa memlekettik qyzmet túrlerin kórsetýde.

Atalǵan ortalyqta daktıloskopıa, medısınalyq pýnkt, emhanalyq saqtandyrý orny, notarıýs pen bank ornalasqan. Sondaı-aq, ortalyqtyń aqparattyq portaly iske qosylǵan. Onda mıgranttar óz-ózderine qyzmet kórsete alady. Sondaı-aq, munda sıfrlyq tehnologıalar qoldanylyp, halyqtyń qajetine jaraýda.

Jaqynda osyndaı ortalyq Astana qalasynyń Esil jáne Saryarqa aýdandarynda ashylmaq. Buǵan qosa, Almaty jáne Aqtóbe qalalarynda mıgrasıalyq HQKO ashylady dep josparlanýda.

Tájibekova Saltanat Shoraqyzy