Búgin Otyrar aýdanynda Ulttyq biryńǵaı test tapsyrý naýqany bastaldy. Tarydaı bop kirgen bilim uıasynan ómirlik bilim qorjynyn toltyryp, arman jebesine maqsat júgin baılap nysanyna bet túzegen túlekter Jambyl atyndaǵy mektep-lıseıiniń bazasyna jınaldy. 

Osy oraıda aýdannyń bolashaq tizgin ustarlaryna  aq jol tilep arnaıy barǵan aýdan ákimi Erlan Aıtahanov oqýshylarmen júzdesip, ómirlik qadamnyń jaýapty sátimen quttyqtady.

– Qurmetti túlekter,  sizderdiń aldaryńyzda úlken bolashaq, uly maqsat pen mindet kútip tur. Halqymyzda «Kim kóp eńbektense, sol jeńiske jetedi»- degen, qanatty sóz bar.  Mektepten alǵan bilimderińiz ben eńbekterińizdiń jemisi joǵary bolady degen senimdemin. 
Búgin - bilim bergen ustazdardyń ǵana emes aýdannyń da senimin aqtaıtyn kún. Sondyqtan Ulttyq Biryńǵaı testileýde sabyrlylyq tanytyp alǵan bilimderińizdi dáleldep, tileýles jandaryńyzdy qýantyp, bıik belesterden kórinińizder. Sizderden burynǵy aǵa – ápkelerińiz bilim synaǵynan jaqsy kórsetkishterge qol jetkizip, aýdanymyzdyń abyroıyn asqaqtatqan edi. Sizderge de solardyń jolyn berýdi násip etip, oblystaǵy aldyńǵy úshtikten kórinýlerińizge tilektespin!"- dedi, aýdan basshysy.

Aıta ketsek, bıyl aýdan boıynsha 53 oqýshy «Altyn belgi»  ıegeri atansa,  20  oqýshy úzdik atestatty  qorǵap shyqty. Aýdan boıynsha 711 túlek atestat alyp altyn uıa mektepterinen túlep ushsa, 516  oqýshy, onyń ishinde 509-y  qazaq tilinde, 7 oqýshy  orys tilinde Ulttyq biryńǵaı testileýge barýǵa ótinish bildirgen. Aǵymdaǵy  jyly aýdannyń ulttyq biryńǵaı testileýge qatysý paıyzy 72,5 paıyzdy  qurap otyr.
 

Elbasy Nursultan Ábishuly Nazarbaevtyń naýryz aıyndaǵy "Prezıdenttiń bes áleýmettik bastamasy" atty halyqqa úndeýinde tehnıkalyq salaǵa basa kóńil bólýdi aıta ketken bolatyn. Osy oraıda,  atalǵan salaǵa aýdan jas túlekteriniń  qyzyǵýshylyǵy joǵary.

"Bıyl elimiz boıynsha 15-shi ret ótip otyrǵan jaýapty kezeńde bilimin óz deńgeıinde aqtap shyqqan aýdan shákirtteri túrli mamandyqtar boıynsha bilim alyp, týǵan jerge kelip eńbek etedi degen senim mol. Qashan da bilimdi, bilikti jas kadrlardy qajetti jumyspen qamtamasyz etýge daıynbyz"-deıdi, aýdan basshysy E.Aıtahanov.