Búgin, 23 maýsym kúni Grýzıanyń Batýmı qalasynda qazaq kúresinen Eýropa chempıonaty bastaldy, - dep habarlaıdy Halyqaralyq qazaq kúresiniń baspasóz ortalyǵy.
Elimizdiń ulttyq oıynyna álemniń túkpir-túkpirinen 20 memlekettiń 80 sportshysy qatysady, olardyń qatarynda Lıtva, Reseı, Fransıa, Polsha, Túrkıa, Avstrıa, Serbıa, Kıpr, Ázirbaıjan, Irlandıa jáne t.b. bar.
Saıysta Eýropanyń aıtýly sportshylary baq synasady. Atap aıtsaq, Polshanyń birneshe dúrkin chempıony Petr Tomash Talach, dzúdodan Eýropa chempıony Gýram Týshıshvılı jáne taǵy basqalary bar.
Eske sala keteıik, Qazaq kúresinen Eýropa chempıonaty alǵash ret ótip jatyr. Bul týraly Eýropa kúres federasıasynyń prezıdenti Karen Arýtúnán bylaı dedi: "Eýropa elderinen osy týrnırdi ótkizý quqyǵyn Grýzıa jeńip aldy. Sebebi Grýzıa - balýandar eli. Toǵyz salmaq boıynsha 1-orynǵa 1000, 2-orynǵa 700, 3-orynǵa 500, absolútti salmaq dárejesine 3000, 1-2-shi oryndarǵa 2000, 3-orynǵa 1000 dollar aqshalaı syılyq tabystalady. Kóbinese dzúdoshylar qatysyp jatyr. Biz kúrestiń dzúdomen qatar turǵanyn qalaımyz".
Sonymen qatar, Qazaq kúresinen halyqaralyq federasıasynyń Bas dırektor keńesshisi Ulan Rysqul ulttyq sport túriniń Eýropada nasıhattalýy úshin jumys jasap jatqanyn aıtty.
«Bul týrnır kári qurlyq sportshylarynyń arasynda ótip jatyr. Sondyqtan, qazaq balýandary qatyspaıdy. Qazaq kúresinen jaqynda ǵana Eýropa federasıasy ashyldy.
Qazaqstannan alty tóreshi, shetelden on tóreshi keldi. Jarys bastalmas buryn qazaq kúresi saıysynda qalaı tórelik etý týraly master-klass, sportshylar arasynda erejeleri jóninde semınar ótkizdik», - dedi.
Sondaı-aq, Qara teńizdiń jaǵasynda ótip jatqan chempıonatta 100+ salmaq dárejesinde ýkraınalyq Leonıd Hasúk atty dzúdoshy alǵash ret qazaqsha kúrespekshi.
"Dzúdomen aınalysamyn.
Álem chempıonatyna da barýym múmkin. Men áli kúresip kórmedim, tek vıdeodan qarap úırendim. Búgin alǵash ret beldesemin",- dedi sportshy.
Aıta ketsek, Halyqaralyq qazaq kúresi federasıasyna 19 el múshelik etedi. Búgingi jarystyń negizgi uıymdastyrýshy - Eýropa asosıasıasy.
