«Bıznestiń jol kartasy 2020» bıznesti qoldaý men damytýdyń biryńǵaı baǵdarlamasy aıasynda shaǵyn kásipkerlerdiń nesıesin sýbsıdıalaý týraly «Damý» qory, EDB jáne kásipkerler arasyndaǵy úshjaqty kelisimge endi elektrondy formatta qol qoıylady. Nesıeni sýbsıdıalaý túrindegi memlekettik qyzmet túrin alý shartyna budan bylaı ýaqyt, ornalasqan jerine qaramastan qol qoıýǵa bolady. Ol úshin tek ınternet jelisi men elektrondy-sandy qoltańba ǵana kerek.

«Damý» Qorynyń Basqarma tóraǵasy Abaı Sarqulovtyń aıtýynsha, atalǵan qyzmettiń qoljetimdi bolýynyń artyqshylyqtary kóp. Atap aıtqanda, sýbsıdıalaý týraly shart rásimdeýge ketetin ýaqyt qysqaryp, shyǵyndar azaıady. «Sýbsıdıalaý týraly oń sheshim shyqqan soń kásipkerler kómekqarjy alýǵa jasalǵan shartqa onlaın  rejımde qol qoıa alady. Osylaısha shartqa qol qoıý úshin (shartqa qosymsha kelisimge qol qoıý úshin de) alys aýdandardan Qor fılıalyna kelip nemese atshabardyń qyzmeti úshin shyǵyndanyp qajeti joq. Elektrondy shartty onlaın túrde jasap, birneshe sekýnd ishinde qol qoıa alasyz. Buǵan deıin sýbsıdıalaý shartyna qaǵaz júzinde qol qoıý rásimine 5-7 jumys kúnine deıingi ýaqyt ketetin».

Sýbsıdıa berýde elektrondy qujat aınalymyn alǵashqy bolyp «SesnaBank» AQ engizdi. Qor qyzmettiń qanatqaqty synaǵyn sátti júzege asyrdy. Aldaǵy ýaqytta bul qyzmet Qordyń barlyq klıentterine qoljetimdi bolady. Bul qyzmet «Documentolog» JSHS kompanıasynyń elektrondy qujattarmen almasýdyń Qazaqstandyq ortalyǵy (Doc24.kz) alańynda júzege asyryldy. Iaǵnı, qyzmetti 100% qazaqstandyq ónim deýge bolady.

Qyzmet kórsetý prosesterin únemi jetildirilip otyrýy kásipkerlerge memleketten qoldaý alý sharalaryn jeńiledetedi.  «Men qonaq úı qyzmetin kórsetetin kásipkermin. Atalǵan shartqa onlaın qol qoıý múmkindigi týraly estigenimde óz shartyma qol qoıatyn kezge týra kelse dep tiledim. Sebebi ár mekemege bir baryp, kezek kútip otyrý ýaqytty alady. Sýbsıdıalaý týraly shartqa úsh jaqtan qol qoıý rásimin onlaı rejımde atqarǵanyma sene almaı da otyrmyn. Bul óte ońaı, jyldam, jarıaly jáne yńǵaıly. Tek ınternet pen elektrondy-sandy qol úlgisi bolsa jetip jatyr. Buǵan qol jetkizý jolynda «Damý» Qory úlken eńbek  etkeni túsinikti. Men olarǵa alǵys aıtqym keledi», - deıdi kásipker Raev Muratbek Júrisbekuly (Aımurat JK)

Nesıege sýbsıdıa alý úshin ótinim berý avtomattandyrylyp, bıyl kúzde www.egov.kz veb-portalyna ornalastyrylady. Munymen qatar jyldyń ekinshi jartysynan bastap eGov  portalynda 182 mln teńgeden astam nesıe alýshyǵa beriletin kepildik prosesi de avtomattandyrylady.

Esterińizge sala keteıik, 2016 jyly kóktemde shaǵyn jáne orta kásipkerlikke qarjylyq qoldaý kórsetý boıynsha elektrondy úkimet portaly platformasyna engizilgen tuńǵysh memlekettik qyzmet túri – «Damý» Qorynyń kepildigi edi.  Nesıe alý úshin kepilzat jetpegen kezde Qordyń kepildigin paıdalaný qyzmeti avtomattandyrylǵaly beri eGov  portaly arqyly 2 403 kepildik berilgen. Iaǵnı onlaın-ótinimder úlesi shamamen 40%-dy quraıdy. Bul qyzmetke qol jetkizý úshin portalǵa tirkelip, ótinim toltyryp, banktiń oń sheshimi jaıly hattyń elektrondy kóshirmesin qosa qystyryp, sandy-elektrondy túrde qol qoıý kerek. Ótiniminiń qaı deńgeıde qaralyp jatqanyn kásipker jeke kabıneti arqyly baqylaı alady.