14 maýsymda Atyraý oblysynda "Nur Otan" partıasy fılıalynyń saıası keńes búrosynyń keńeıtilgen májilisi ótti, kún tártibinde barlyq mektepterge úshtildilik júıesin engizý, bilim berý mekemelerin sıfrlyq tehnologıaǵa kóshirý taqyryptary qoıyldy. Qazir aımaqta coworking-ortalyqtar men aǵylshyn tilin oqytatyn úıirmeler qarqyndy túrde ashylyp jatyr.

Elbasy Nazarbaevtyń "Bolashaqqa baǵdar: Rýhanı jańǵyrý" maqalasynda "jer júzindegi mıllıardtan astam adam óziniń týǵan tilimen qatar, kásibı baılanys quraly retinde japatarmaǵaı oqyp jatqan aǵylshyn tilin bizdiń de jappaı jáne jedel úırenýimiz kerektigi esh dáleldeýdi qajet etpeı­tindeı" dep aıtylǵan bolatyn.
Májiliske tóraǵalyq etken Atyraý oblysynyń ákimi Nurlan Noǵaev saıası keńes múshelerine oqýshylarǵa aǵylshyn tilin oqytý boıynsha memlekettik baǵdarlamany tabysty júzege asyrý úshin jospar jasaqtaýdy usyndy.

-Búginde aǵylshyn tili halyqaralyq baılanys tiline aınaldy, ekonomıkasy damyǵan elderdiń turǵyndary men kóshbasshylary sol tilde sóıleıdi. Qazaqstan álemdik tájirıbeden qalys qalmaı, zamanǵa saı damýy kerek, aǵylshyn tilin úırený balalyq shaqtan bastalǵany durys. Osy maqsatta aımaqtaǵy mektepterge úshtildi oqytý júıesin engizip jatyrmyz. Qazaqstannyń óskeleń urpaǵyna sapaly bilim berý úshin aǵylshyn tilin pedagogtar da oqýlary kerek. Memleket basshysy aıtqandaı, balalardy aǵylshyn tiline qazir oqytpasaq, bolashaqta tolyqqandy kadr daıyndaýdy júzege asyra almaımyz. Bul másele barlyq jaýapty adamdardyń baqylaýynda bolýy tıis, - dedi Nurlan Noǵaev.

Aıta keteıik, "Nur Otan" partıasynyń bastamasymen aımaqta coworking-ortalyqtar ashylyp jatyr, onda balalar aǵylshyn tili men jańa sıfrlyq tehnologıalar boıynsha bilim alady. İT – ortalyq H.Dosmuhamedov atyndaǵy Atyraý memlekettik ýnıversıtetiniń bazasynda ashyldy, onda jalpy bilim beretin mektepterdiń mamandary oqytylady.

Aımaq basshysy "Nur Otan" partıasy saıası keńes búrosynyń múshelerimen birge jańa ortalyqqa baryp, jumysymen tanysty jáne naqty tapsyrmalar berdi.

İT salasynda maman daıyndaý isin «Bilim - ınovasıa» lıseıi de keń kólemde júrgizip jatyr, onyń túlekteri álemdegi aldyńǵy qatarly oqý oryndaryna túsýde.
Saıası keńes músheleri Kaspıı óńiriniń qazirgi zamanǵy kolejine de baryp, İT-synyptardy qarady. Bul kolejde negizgi partıalyq jobalar joǵary deńgeıde uıymdastyrylǵan, aǵylshyn tilin úırenýshilerge arnalǵan pikirtalas klýby ashyldy, oqý quraldary men elektrondy kitaphana qoljetimdi, aǵylshyn tilin oqytý synyby bar.

-Aldaǵy úsh jylda "Nur Otan" memlekettik jáne jergilikti atqarýshy organdarmen, ÚEU ókilderimen, bıznes
qurylymmen birlesip elimiz boıynsha programmalaý men robottehnıka negizderin oqytatyn 1000 tegin İT synyp ashýdy josparlap otyr. Bul jylyna 8 ben 16 jas aralyǵyndaǵy 150 myń balanyń bilim alýyna múmkindik beredi. Atyraý oblysynda osyndaı synyptar ashylǵan 10 mektep bar, -deıdi "Nur Otan" partıasy Atyraý oblystyq fılıaly tóraǵasynyń birinshi orynbasary Nurlybek Ojaev.

Bul oqýshylarǵa qarapaıym algorıtm qurý, baǵdarlamalar men WEB-saıttardy eýropalyq bilim berý standarttaryna saı jasaýǵa múmkindik beredi. Bolashaqta tehnoparkter ashý da josparda bar, sol arqyly aldyńǵy qatarly sıfrlyq daǵdylar men bilimge qoljetimdilik máselesi sheshim tabady.