Ǵ.Slanov atyndaǵy Atyraý oblystyq ǵylymı-ámbebap kitaphanasynda «Rýhanı jańǵyrý» jobasyna oraı Atyraý oblystyq mádenıet, arhıvter jáne qujattama basqarmasynyń qoldaýymen jaryq kórgen «Kaspıı mańy qazaqtarynyń mádenıeti men turmysy HH ǵasyrdyń 20-jyldaryndaǵy fotoqujattarda» atty kitap-albomnyń tusaý keser rásimi bolyp ótti. Tusaýkeser saltanatyna oblystyq, aýdandyq mádenıet mekemeleriniń basshylary, tarıh jáne mádenıet eskertkishterin qorǵaý salasynyń mamandary, ǵalymdar, tarıhshylar, ólketanýshylar, arheologtar, etnograftar, qoǵamdyq uıym ókilderi, stýdentter qatysty.

Oblystyq kitaphana dırektory S.İzmuhambetova sharany júrgizip otyrdy. Oblystyq mádenıet, arhıvter jáne qujattama basqarmasy basshysynyń orynbasary A.Djolaev, oblystyq ardagerler keńesiniń tóraǵasy Q.Rızýanov, ólketanýshylar Ó.Qajymǵalıev pen Ó.Álimgereev, oblystyq arhıvtiń dırektory Á.Muqtar, H.Dosmuhamedov atyndaǵy Atyraý memlekettik ýnıversıtetiniń profesory, t.ǵ.k. J.Jumabaeva jáne oblystyq tarıhı-mádenı murany qorǵaý, qalpyna keltirý jáne paıdalaný jónindegi memlekettik ınspeksıasynyń basshysy M.Kıpıev jańa kitap jóninde pikir aıtyp, sóz sóıledi.

Túsirilimder Odaqtyq jáne avtonomıalyq respýblıkalardy zertteý jónindegi erekshe Komıtettiń, profesor S.Rýdenko bastaǵan Antropologıalyq otrádynyń 1926 jyly Aqtóbe gýbernıasy men Adaı ýeziniń aýmaǵyna júrgizgen dalalyq ǵylymı-zertteý ekspedısıasy barysynda jasalǵan.

Fotosýretterde qazaqtardyń bet-beınesi, sharýashylyǵy, kásibi, qolóneri, baspana jáne turǵyn-jaıy, ulttyq oıyndary men zırattary kórinis tapqan.

Basylym HH ǵasyrdyń 20-jyldarynda Kaspıı mańyndaǵy kóshpeli qazaqtardyń tarıhy men etnografıasyna qatysty jaryq kórgen alǵashqy fotoalbom bolyp tabylady.

Fotoalbomdy Atyraý oblysy tarıhı-mádenı murany qorǵaý, qalpyna keltirý jáne paıdalaný jónindegi memlekettik ınspeksıasynyń basshysy M.Kıpıev bastaǵan zertteýshiler qurastyrdy. Jańa kitap-albomdy oqyrmandar ólke tarıhynyń ótken kezeńin beıneleıtin baǵaly týyndy dep baǵalady.