"Jańa Qazaqstan" forýmy Almatyda baspasóz máslıhatyn ótkizip jatyr, dep habarlaıdy Qamshy.kz aqparat agenttiginiń tilshisi. Forým barysynda saıasatkerler AQSH astanasy Vashıngtonǵa saparlarynyń nátıjesin aıtyp berdi.

Jıynnyń kirispe sózinde saıastaker, forým múshesi Ámirjan Qosanov Úkimetke Ashyq hat joldaǵandaryn habarlady. Ashyq hatta qytaılyq 51 kompanıanyń qyzmeti týraly suraý salynǵan eken. Naqtyraq aıtqanda, kompanıalardyń qyzmeti, ekonomıkaǵa paıdasy, ekologıalyq zıany jáne jumys kúshiniń kimderden quralatyny (qazaqtardan nemese qytaılardan) suralǵan. 

Forým múshesi, saıasatker Rasýl Jumaly AQSH-taǵy kezdesýler jaıly tolyǵyraq aıtyp berdi.

"Bizben birge Amerıkada júrgen kórnekti azamattarymyz – belgili fılosof, saıasattanýshy Ýálıhan Túleshov, Kalıfornıadan kelgen Qanat Ibragımov syndy jigitter qosylyp, kezdesýler ótkizdik. 10-15 shaqty kezdesý men suhbat boldy. Eń negizgileri – AQSH-tyń kongresi men senaty, memlekettik departamenti, ulttyq qaýipsizdik keńesteri, birtalaı iri saraptamalyq ortalyqtaryndaǵy kezdesýlerdi atap ótse bolady. New York Times syndy baspa ókilderimen suhbat boldy. Kezdesýler bir-bir jarym saǵatqa sozyldy.

AQSH – álemdegi jetekshi memleket. Bizdiń maqsat – álemdegi sózi júretin, yqpaly bar elderge "Jańa Qazaqstannyń" sózin jetkizý. Qazaqstanda qatyp qalǵan resmı pikir ǵana emes, demokratıalyq jolmen, adam quqyqtaryn qurmetteý, olardy iske asyrý, jańa kózqarastyń bary, qaýipsizdik, saıası, ekonomıkalyq taqyryptardy talqylaý", - dedi Rasýl Jumaly.

Osy aıdyń aıaǵynda saıasatkerler oblys aralaýǵa shyqpaq. Óńirlerdegi halyqpen kezdesip, forýmnyń negizgi baǵdarlamasyn jasaýdy josparlap otyr.