«Jańa Qazaqstan» forýmy alǵash ashylyp, Brússelge baryp qaıtqanda kópshilikti alańdatqan bir saýal boldy: «Bular aqshany qaıdan alady?». Búgingi baspasóz máslıhatynda saıasatkerler osy suraqqa jaýap berdi, dep habarlaıdy Qamshy.kz aqparat agenttiginiń tilshisi.

Ámirjan Qosanovtyń aıtýynsha, aqsha shaǵyn jáne orta bıznesten túsedi.

«Arqamyzda tirep turǵan eshqandaı olıgarh joq», - dep ashyq aıtty Qosanov.

Óz kezeginde Rasýl Jumaly osy ýaqytqa deıin bolǵan memlekettik mańyzdy saparlardyń qunyna toqtaldy.

«Ár sapardyń quny, ondaǵy jasalatyn kelisimder, qaryz ben ınvestısıalar 5-10 mlrd dollarǵa deıin shyǵady. Máselen, AQSH-qa sapardyń quny 7 mlrd dollar boldy. Al biz sonyń suraýyn umytamyz. Ol – siz ben bizdiń qarajatymyz. Onyń mańyzy, onyń taǵdyry, qaıtarymy qandaı bolmaq? Ol qaryzdy erteń kim óteıdi? Árıne, bizdiń urpaq. Nege osy suraqtyń jaýaptaryn izdemeımiz?», - dedi ol.

Aıta keteıik, Almatyda "Jańa Qazaqstan" forýmynyń baspasóz máslıhatyn ótip jatyr.  Forým barysynda saıasatkerler AQSH astanasy Vashıngtonǵa saparlarynyń nátıjesin aıtyp berdi. AQSH-ta asharshylyqqa baǵa berý, bıliktiń tranzıti, parlamenttik júıege aýysý máselesi, sonymen qatar Qytaıdaǵy qazaq máselesi kóterilgen.