Almaty qalasyndaǵy A.P.Chehov atyndaǵy kitaphanada Astananyń 20 jyldyǵyna oraı saıasattanýshy Rasýl Jumalymen kezdesý ótti. Jıyndy Almaty qalasy İshki saıasat basqarmasynyń tapsyrysymen «El-shejire» qoǵamdyq qory uıymdastyrdy.

İs-sharanyń basty maqsaty –Astana álemdik saıası sheshimderdiń ortalyǵy bola alǵandyǵyn jastarǵa jáne qala turǵyndaryna túsindirý. Elordany aýystyrý saıası daǵdarystyń aldyn alýǵa arnaıy jasalǵandyǵy jaıynda júıelep jetkizý.

Kezdesýde Rasýl Jumaly Astananyń ishki, syrtqy saıasatyn salmaqtap, oramdy oılarymen bólisti. Sondaı-aq, «26 jyldyq egemendi elimizdiń  táýelsizdik tarıhynda eń bir tushymdy, nátıjeli ulttyq jobasy osy Astanamyzdy aýystyrý boldy. Muny úlken jetistik retinde qabyldaımyn. 1998 jyldyń basynda biz Astanaǵa kóshtik. Ol kezde naǵyz orystardyń qalasy bolatyn. Qazaqstan degen ataýy ǵana bolmasa, kádimgi Reseıdiń bir provınsıasynda júrgendeı kúı keshetinsiń. Al qazir she? Burynǵydan aıyrmashylyǵy, artyqshylyǵy óte kóp. Barlyǵyn qazaqylandyryp naǵyz laıyqty elordaǵa aınaldy. Tipti jan-jaǵyndaǵy óńirlerge de áseri tıdi. Ulttyq ustanym, salt-dástúr, ádet-ǵuryp qalyptasty», – dep ótkeniń eske alyp, búginge shúkirlik aıtty. Buǵan qosa, saıasattanýshy elimizdiń syndarly, salmaqty saıasatyna toqtaldy. Álem elderi men óz memleketimizdiń damý qarqynyn, mártebesin, múmkindikterin salystyrdy. Búginde damý jolynda júrsekte, básekege túsip, ıyq tirestire alatyn deńgeıde ekenimizdi erekshe atap ótti. Sonymen qatar, Astanany kóshirý –qazaq tarıhyndaǵy eleýli oqıǵanyń, mańyzdy sheshimniń biregeıi ekeniń taǵy da eske saldy.

Kezdesý sońynda qala qonaqtary men stýdentter kókeıindegi suraqtaryn qoıyp, áńgimeni ádemi órbitti. Sonymen qatar, «El-shejire» qoǵamdyq qory atynan A.P.Chehov atyndaǵy kitaphanaǵa, Rasýl Jumalyǵa «Alashorda fotoalbomy» atty kitap syıǵa berildi.