Muhamedjan Tazabek óziniń feısbýk paraqshasynda QR Mádenıet mınıstri týraly "Maıtalman mınıstr" degen jazba jarıalapty. Qamshy aqparat agenttigi óz kezeginde oqyrmanǵa berer paıdasy mol degen maqsatpen nazarǵa usynýdy jón sanady.
"Búgin, Astana tórindegi aıtýly sharada, eki myń adamnyń arasynda, dúbirletip dombyra tartyp otyrǵan maıtalman mınıstrdi kórip, kóńilim súısindi.
Ia, qazaqı qasıetterimiz qaıta oraldy. Qansha ǵasyr tolarsaqtan saz keship júrip ańsaǵan kúnge jettik. Babalarymyz tulparynyń tuıaǵymen dúbirletken dúnıe júzin "Ulttyq dombyra kúni" dombyranyń únimen kúmbirlettik. Jyl saıyn "Altyn tulpar" alaman báıgesin, "Qazaqstan barysy" kúres dodasyn kórmesek, kóńilimiz kónshimeıtin dárejege jettik. Odan qalsa, ulttyq salt sanamyz ben dástúr-ǵurpymyzdyń kóne kerýeni dalamyzǵa Astanadaǵy aıryqsha etno-aýyl bop oraldy. Kelýshiler sadaq atyp, ulttyq buıym alyp, ulttyq sportty tamashalap, ulttyq qolónermen aınalysyp, naǵyz qazaq ekendigin shynaıy sezine alatyn etno-aýyl qalalyq qazaqtardyń demalys mádenıetine tóńkeris ákelgen oıyn-saýyq boldy. Kúnnen kúnge aıtystaı tól ónerimizdiń qadiri memlekettik deńgeıde kóterilip, tárbıelik máni zor jyr-termelerimizdiń nasıhaty kúsheıip, dástúrli ónerimiz qanat jaıyp keledi. Qazaqtyń mádenıet maıtalmandary tek memleket aıasynda ǵana emes, jahandyq deńgeıde de ónerin kórsetip, qazaq balasyn kúlli álemge tanytyp jatyr. Aıta bersek, atqarylǵan ister tizimi taýsylar emes. Mine, naǵyz rýhanı jańǵyrý! Alaıda, asqar taýdyń jer betindegi kózge túsetin bıiktiginen jer astyndaǵy kópshilik kórmeıtin tereńdigi úlken bolatyny sıaqty, ulan-asyr sharalardyń ar jaǵynda turǵan asyl azamattar kóp jaǵdaıda kóleńkede qap jatady. Joǵaryda atap ótken, tikeleı Elbasymyzdyń tapsyrmasynan bastaý alǵan ıgi sharalardyń tolyq atqarylýyn óz moınyna alyp, kúndiz-túni tynymsyz eńbek etip jatqan mádenıet mınıstri Arystanbek Muhamedıulyna paıymdy jurttyń alǵystan basqa aıtary joq. Arystan aǵamyzdyń, osynaý mádenıet isiniń soqtyqpaly jolynda qańqý sózge de, keleńsiz qarsylyqtarǵa da tótep berip, saıası synaqtarǵa synbaı, ult múddesi úshin tókken teri paryqsyz pendeniń ǵana kózine kórinbes. Elge de rýx bergen, Elbasynyń da alǵysyn alǵan qyrýar eńbek óziniń tarıhı baǵasyn bıik dárejede alyp jatyr dep oılaımyn. El úshin týǵan erler men er týdyrǵan el aman bolsyn! Qazaqtyń táýelsizdigi tuǵyrly, tynyshtyǵy turaqty, beıbitshiligi berekeli bolsyn!"
