Hromtaý qalasynyń myńdaǵan turǵyndary Dóń taý-ken baıytý kombınatynyń 80 jyldyǵyn atap ótti. Qala quraýshy kásiporynnyń mereıtoıyna oraı «Kenshi» stadıonynda ınteraktıvti buqaralyq qoıylymdy orasan zor shoý ótti. Kásiporynnyń úzdik qyzmetkerlerin quttyqtap, Qazaqstan men Reseıdiń tanymal oryndaýshylary óner kórsetti.
Mereıtoıdy merekeleý aıasynda Aqtóbe oblysynyń ákimi Berdibek Saparbaev pen ERG menedjerler keńesiniń tóraǵasy Hromtaý qalasynda Dóń taý-ken baıytý kombınatynyń qyzmetkerleri úshin salynǵan 120 páterli jańa úıge bardy.
- Árbir adam úshin óz baspanasy bolǵany mańyzdy. Sondyqtan, Prezıdentimiz Nursultan Nazarbaev basqarǵan elimiz árbir qazaqstandyqty baspanamen qamtamasyz etýdiń kóptegen baǵdarlamasyn júzege asyrýda. Sonyń ishinde, memlekettik baǵdarlamalardyń arqasynda «Qazhrom» syndy kompanıalar óz qyzmetkerlerine turǵyn úıler salyp jatyr. Elordamyzdyń 20 jyldyǵymen jáne Dóń taý-ken baıytý kombınatynyń80 jyldyǵymen tuspa-tus kelgen qonystoı eki ese qýanysh ákelerine senimdimin. Ár úıge jylýlyq, jaılylyq pen amandyq tileımin, - dedi quttyqtaý sózinde oblys ákimi.
Bes qabatty úı Hromtaýdyń tirshilik qaınaǵan aýdanynda turǵyzylǵan. Oǵan jaqyn aýmaqtar abattandyrylǵan, aýlada balalar alańy bar. Páterler taza árleýde berilip jatyr, as úı peshteri men santehnıkasy ornatylǵan.Dóń taý-ken baıytý kombınaty qyzmetkerleri úshin jańadan salynǵan úıdiń bir sharshy metri 118 myń teńgege jýyq. Eýrazıalyq toptyń turǵyn úı baǵdarlamasymen páterlerdi 20 jylǵa deıin tómen paıyzdyq mólsherlememen satyp alý quqyǵymen jalǵa berý qarastyrylǵan. Bul Elbasynyń «Nurly jer» baǵdarlamasy men Qazaqstandyq ıpotekalyq kompanıamen kelisimge qol qoıýdyń arqasynda múmkin boldy.
ERG menedjerler keńesiniń tóraǵasy kombınattyń bes jas mamanyna páter alýǵa sertıfıkattar tabys etti.
- Men Hromtaýǵa alǵash ret 24 jyl buryn kelgen edim. Sodan beri qala Prezıdentimizdiń arqasynda ózgerip ketken. 24 jyl emes, 100 jyl ótkendeı. Búgin men jańa úıdiń ashylýyna qatysqanymyz úshin sheksiz qýanyshtymyn. Biz bul isti jalǵastyramyz, óıtkeni áleýmettik ahýal, kóńil-kúı, qyzmetkerlerdi baspanamen qamtamasyz etý óte mańyzdy bolyp tabylady, - dedi Aleksandr Mashkevıch.
ERG-niń turǵyn úı baǵdarlamasyn júzege asyrý kezeńi ishinde Hromtaýda DTKBK-nyń 500-ge jýyq qyzmetkeri baspanaly boldy.
Negizgi saltanatty shara «Kenshi» stadıonynda ótti. SharaDTKBK-nyń 80 jyl ishindegi jetistikteri týraly baıandaǵan ádemi ınteraktıvti shoýdan bastaldy. Sahna tórinde úzdik jumysshylar marapattalyp, oblys ákiminiń maqtaý qaǵazdaryn, korporatıvtik marapattardy ıelendi.
On qyzmetkerge avtoóliktiń kiltterin tabys etti.
Qazaqstandyq estrada juldyzy Qaırat Nurtastyń Dóń taý-ken baıytý kombınaty qyzmetkerleriniń balalarymen birge óner kórsetýi tosynsyı boldy. Kesh reseılik «Serebro» tobynyń ónerimen jáne merekelik ot-shashýmen aıaqtaldy.
Aıta keteıik, Dóń taý-ken baıytý kombınatynyń 80 jyldyq jumysynda 208 000 000 tonnadan astam hrom rýdasy óndirilgen. Bul uzyndyǵy 41 600 shaqyrymdyq temirjol quramyna teń, ıaǵnı jer ekvatorynyń uzyndyǵynan kóp.
