«Siz óz eńbegińizdiń arqasynda Qazaqstan halqynyń qurmetine bólenip, halyqaralyq deńgeıde joǵary bedelge ıe boldyńyz. Sizdiń eýrazıalyq ıntegrasıa jónindegi ıdeıalaryńyz elderimizdiń áleýmettik-ekonomıkalyq damýyna, Eýrazıa qurlyǵyndaǵy turaqtylyq pen qaýipsizdikti qamtamasyz etýge septigin tıgizip, dáıekti túrde júzege asyrylyp keledi.

Shyn júrekten Sizge zor densaýlyq, baq-bereke, amandyq jáne jańa jetistikter tileımin», – delingen jedelhatta.

***

Belarýs Respýblıkasynyń Prezıdenti Aleksandr Lýkashenko Nursultan Nazarbaevtyń eki el arasyndaǵy qarym-qatynastardy strategıalyq turǵyda nyǵaıtýǵa qosqan jeke úlesin belarýs halqy joǵary baǵalaıtynyn atap ótti.

«Sizdiń jasampaz jáne jan-jaqty qyzmetińiz Qazaqstandy qýatty ári táýelsiz elge aınaldyrdy, al syndarly ári kóregen syrtqy saıasatyńyz halyqaralyq arenada keń qoldaýǵa ıe boldy.

Eki jaqty áriptestikti nyǵaıtý bizdiń dostas halyqtarymyzdyń múddesine jáne ortaq eýrazıalyq úıimizdi damytýǵa odan ári qyzmet ete beredi dep senemin», – delingen jedelhatta.

***

Túrikmenstan Prezıdenti Gýrbangýly Berdimuhamedov óz hatynda Memleket basshysynyń Qazaqstan halqynyń ıgiligi jolyndaǵy barlyq bastamalarynyń tabysty júzege asyrylýyna tilektestik bildirdi.

«Sizdiń dana basshylyǵyńyzdyń arqasynda baýyrlas Qazaqstan Respýblıkasy áleýmettik-ekonomıkalyq damý jolynda zor jetistikterge jetip, halyqaralyq arenadaǵy bedelin dáıekti túrde nyǵaıtyp keledi.

Eki jaqty qatynastarymyzdyń joǵary deńgeıi Túrikmenstan-Qazaqstan arasyndaǵy strategıalyq seriktestikti jáne memleketaralyq baılanystardy barlyq baǵyttar boıynsha odan ári keńeıtý úshin berik negiz bolatynyna senimdimin», – delingen jedelhatta.

***

Armenıa Respýblıkasynyń Prezıdenti Armen Sarkısán óz jedelhatynda eki el arasynda qalyptasqan syndarly ózara is-qımyl Armenıa-Qazaqstan memleketaralyq yntymaqtastyǵynyń kún tártibin eleýli túrde tolyqtyra túsetinin atap ótti.

«Siz memleketti basqarý isindegi mol tájirıbeńizdiń, Qazaqstan Respýblıkasynyń múddesin tabandylyqpen qorǵaı biletindigińizdiń jáne keń kólemdi halyqaralyq yntymaqtastyqty ilgeriletý mindetterin sheshe alatyndyǵyńyzdyń arqasynda halyqaralyq arenada zor qurmet pen barsha jurt moıyndaǵan bedelge ıe boldyńyz.

Sizge zor densaýlyq, amandyq pen tolaıym tabys, al Qazaqstan halqyna beıbit ómir men baq-bereke tileımin», – delingen jedelhatta.

***

Moldova Respýblıkasynyń Prezıdenti Igor Dodon Nursultan Nazarbaevty týǵan kúnimen quttyqtap, Eýrazıalyq ekonomıkalyq odaqty qurýǵa jáne qalyptastyrýǵa zor úles qosqanyn atap ótti.

«Siz ótken ǵasyrdyń 90-shy jyldarynyń ózinde elderimiz úshin qazirgi kúrdeli álemde egemendik pen táýelsizdikti saqtaýmen qatar óz ekonomıkalyq áleýetin arttyrýdyń mańyzdy ekenin de túsinip, osy maqsatpen eriktilik pen teń quqyly ustanymǵa negizdelgen memleketaralyq birlestik qurýdy usyndyńyz. Sizdiń ıdeıańyz júzege asyp, Eýrazıalyq ekonomıkalyq odaq quryldy. Osy uıymda Moldova Respýblıkasy baqylaýshy memleket mártebesin aldy», – delingen jedelhatta.

***

Ispanıa Koroli VI Felıpe Astananyń 20 jyldyq mereıtoıyna jáne Memleket basshysynyń týǵan kúnine oraı quttyqtaý jedelhatyn joldady.

«Astana «EKSPO-2017» halyqaralyq kórmesiniń ashylý rásimine qatysý úshin Sizdiń elińizge saparmen barǵanda qonaqjaılyq tanytyp, meni ystyq yqylaspen qarsy alǵanyńyz esimde.

Osy tamasha múmkindiktiń arqasynda men elordańyzdyń zamanaýı ınfraqurylymy bar ári jarqyn bolashaqqa umtylǵan iri qalaǵa aınalǵanyn kórdim», – delingen jedelhatta.

***

Polsha Respýblıkasynyń Prezıdenti Andjeı Dýda Qazaqstan men Polsha arasyndaǵy dostyq qatynastar eki jaqty tabysty yntymaqtastyqtyń dáleli ekenin atap ótti.

«Qazaqstan Polshanyń Ortalyq Azıa óńirindegi mańyzdy áriptesteriniń biri sanalady.

Jahandyq problemalardy sheshý isine belsendi atsalysqanyńyz úshin Sizge zor qurmetpen qaraımyn. Qazaqstannyń Birikken Ulttar Uıymynyń Qaýipsizdik Keńesine tóraǵalyq etý kezindegi bastamalary, sonyń ishinde ózim qatysqan joǵary deńgeıdegi jaryssózder – sonyń aıqyn dáleli. Siz qolǵa alyp jatqan ıgi ister óńirde jáne álemde beıbitshilik pen qaýipsizdikti nyǵaıtýǵa septigin tıgizedi den senemin», – delingen jedelhatta.

***

Serbıa Respýblıkasynyń Prezıdenti Aleksandr Výchıch barsha qazaqstandyqtardy Astananyń 20 jyldyǵymen quttyqtap, Memleket basshysyna jaýapty qyzmette tabysqa jete berýine tilektestik bildirdi.

«Qazaqstannyń qol jetkizgen jetistikterine tánti ekenimdi bildirgim keledi. Siz tıimdi basshylyǵyńyzdyń arqasynda «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri», «Bes áleýmettik bastama», «Qazaqstan – 2050» strategıasy» sıaqty bastamalar aıasynda kózdegen maqsattaryńyzdyń bárine qol jetkizesiz dep senemin.

Sizdiń kóregendigińiz ben jumysqa berilgendigińizdiń arqasynda Qazaqstan qaryshtap damyp, birte-birte álemde mańyzdy orynǵa ıe bolyp kele jatyr», –delingen jedelhatta.

***

Bolgarıa Respýblıkasynyń Prezıdenti Rýmen Radev eki jaqty negizdegi jáne Eýropa Odaǵy men Qazaqstan qarym-qatynastary aıasyndaǵy memleketaralyq dıalogtyń damý barysyna kóńili tolatynyn aıtty.

«Elderimiz ben halyqtarymyzdyń arasyndaǵy dostyq qarym-qatynastar bizdiń saıası, ekonomıkalyq jáne mádenı salalardaǵy yntymaqtastyǵymyzdyń nyǵaıýyna óz úlesin qosatynyna senimdimin», – delingen jedelhatta.

***

Grýzıa Prezıdenti Gıorgıı Margvelashvılı Qazaqstan táýelsizdik alǵan sátten bergi, salystyrmaly túrde, az ýaqyt ishinde Nursultan Nazarbaevtyń basshylyǵynyń arqasynda qýatty, damyǵan, joǵary halyqaralyq bedel men senimge ıe bolǵan memleketke aınalǵanyn atap ótti.

«Bul kúnderi 20 jyldyǵyn atap ótip jatqan Astana zamanaýı Qazaqstan damýynyń sımvoly ekeni sózsiz.

Sizdiń Grýzıa men Qazaqstan arasyndaǵy yntymaqtastyqty damytýǵa jáne nyǵaıtýǵa ólsheýsiz úles qosqanyńyzdy erekshe atap ótkim keledi. Eki el arasyndaǵy dostyq pen ózara tıimdi qarym-qatynastar dástúri aldaǵy ýaqytta da nyǵaıa beredi dep senemin», – delingen jedelhatta.

***

Reseı Federasıasy Úkimetiniń tóraǵasy Dmıtrıı Medvedev óziniń quttyqtaý jedelhatynda Qazaqstan Prezıdentiniń eki memleketti baılanystyratyn dostyq qarym-qatynastardy, tatý kórshilikti jáne odaqtastyqty nyǵaıtýǵa qosqan jeke úlesin erekshe atap ótti.

«Saýda-ekonomıkalyq jáne ınvestısıalyq yntymaqtastyq dáıekti túrde damyp keledi jáne energetıka, ónerkásip, ınfraqurylym, joǵary tehnologıalar men basqa da salalardaǵy perspektıvti birlesken jobalar júzege asyrylýda.

Úkimetterimiz arasyndaǵy belsendi áriptestikke negizdelgen jumystar tájirıbe júzindegi kooperasıany odan ári arttyrýǵa jáne Eýrazıalyq ekonomıkalyq odaq aıasyndaǵy ıntegrasıalyq is-qımyldarymyzdy tereńdetýge septigin tıgizedi dep senemin», – delingen jedelhatta.