Ulttyq ulannyń astanalyq quramasynda elimizdiń 14 oblysynan shaqyrylǵan 800-ge jýyq jaýynger ant qabyldady. 2018 jylǵy 7-shildede bas qala irgesindegi áskerı qalashyq aýmaǵynda jas Otan qorǵaýshylar eli men halqyna adal qyzmet etýge sert berdi.
Sap túzegen sarbazdarmen qatar, olardy qoldaýǵa kelgen jurtshylyq ta qosylyp Memlekettik Ánurandy shyrqady. Ulttyq ulan Bas qolbasshysynyń orynbasary general-maıor Muqametqalı Satov, ásker ardagerleri Qalıaqpar Toqyshev pen Dáýlet Salhanov, 5573 áskerı bóliminiń komandıri polkovnık Sákentaı Shekarbekov jaýyngerlerdi Otan qorǵaýshylar qataryna qosylýymen quttyqtady.
- Búginnen bastap sizder – el tynyshtyǵynyń senimdi qorǵanysyzdar! Qaı memlekettiń bolmasyn, damýy jolynda onyń ishki tynyshtyǵynyń mańyzy óte zor. Sol sebepti, qazir ǵana osy alańda qabyldaǵan anttyń árbir sózine adal bop, táýelsizdigimizdi kózdiń qarashyǵyndaı qorǵaıtyndaryńyzǵa senemin! Osyndaı jaýapty jolda denderińizge saýlyq, qyzmetterińizge tabys tileımin!Áskerı ómirde bir-birińizge baýyrdaı jaqyn joldas, komandırlerińizge senimdi serik bolýǵa shaqyramyn. Qazaqstandyq jaýynger ataǵyn bıik ustap, júktelgen mindettiúlken abyroımen atqaryp shyǵýǵa tilektespin, - dedi qurama komandıri Sákentaı Amantaıuly!
Qyryq kún buryn 5573 áskerı bóliminiń tabaldyryǵyn attaǵan bul sarbazdar arnaıy daıyndyqtan ótip, saptyq júris pen ásker isiniń qyr-syryn meńgerip jatyr. Endi sál kúnde qalamyzdyń qoǵamdyq tártibin, qala turǵyndary men qonaqtarynyń tynyshtyǵyn kúzetetin bolady. Sondaı-aq, bas qalamyzda ótetin barlyq mádenı-kópshilik, saıası-qoǵamdyq, sporttyq sharalar men resmı basqosýlar kezinde de qaýipsizdikti qamtamasyz etý – osy ulandardyń enshisinde. Elorda ulandary sheteldik delegasıalardy qarsy alýǵa, tabıǵı apattar men tótenshe jaǵdaılarda halyqqa kómek kórsetýge, daǵdarysty kıkiljińderde eldi tynyshtandyrýǵa jumyldyrylady.
Osyndaı jaýapty mindet atqaratyn bolǵandyqtan jedel quramaǵa jańadan qosylǵan jaýyngerler aǵa býyn sarbazdar sekildi arnaıy jattyǵýlar men daıyndyqtardan, nusqaýlyqtardan ótkizildi.
- Búgin osy sapta turǵan árbirimiz úshin óte mańyzdy kún. Biz óz Otanymyzǵa ant berip, táýelsiz Qazaq elin qorǵaýǵa qadam bastyq. Ejelden batyr babalarymyz Otanǵa qyzmet etýdi óziniń er azamattyq mindeti sanaǵanyn bilemiz. Biz de osy jaýyngerlik dástúrdi jalǵastyrýǵa daıynbyz. Ulttyq ulanda qyzmet etý, elimizdiń júregi – Astanamyzdyń tynyshtyǵyn kúzetý – biz úshin úlken mártebe. Sizderge Elimizdi adal qorǵaýǵa, erjúrek, rýhty jaýynger bolýǵa sóz beremiz! - deıdi ant qabyldaýshy qatardaǵy Ulan Dúısen.
Saltanatty Ant qabyldaý sharasyna Ulttyq ulan Bas qolbasshylyǵy, memlekettik vedomstvolar men kúsh qurylymdarynyń basshylyqtary, ardagerler men sarbazdardyń týǵan-týystary qatysty. Áskerı bólimniń alyp alańyna sardarlar men sarbazdardy eseptemegenniń ózinde 3 jarym myńnan asa adam jınalyp, jas jaýyngerlerdiń Otan qorǵaýshylar qataryna qosylýyna kýá bop, saltanatty saptyq sherýin tamashalady. Sondaı-aq, qonaqtar «Ashyq esik kúni» aıasynda áskerı ómirdiń tynys-tirshiligimen, sarbazdardyń turmysymen tanysty.